Şahîdê Terteleyê Dêrsimî Çîçe û Dumane dinyaya xo bedilnaye

Şahîdê Terteleyê Dêrsimî Eşlîye Çîçe û Necefe Duman dinyaya xo bedilnaye. Dumane û Çîçe dewa Zîmekî de ameyî definkerdene.

Şahîdê Terteleyê Dêrsimî  Eşlîye Çîçe (Fecire Erol) a ke dewa Zîmekî ya Xozatî ra ya  û Necefe Duman a ke mezraya Hopîkî ya dewa Zîmekî ra dinyaya xo bedilnaye. Dumane û Çîçe vizêr dewa Zîmekî de ameyî definkerdene. Necef Duman gama ke şarê Dêrsimî dîya guleyan ver binê meyîtê dayîka xo de weş mendbî.

Çîçeya ke Ajansê Xeberan ê Pîrha rê verî  qisey kerdbi, derheqê terteleyî de nê vatbî. “ Her kes arê da berd cayê harmanî. Ûca de tifinkê makîneyin amebî ronayene. Her kes qîra, tay kesî remayî. Cinî û camêrdî kerdî cîya, bêrdê koyan, vat ‘ma fotrafanê şima vejenê.’ Ma domanî bermayêne, ma vêşanbî awe, nan waştêne. Dayîka mi ez û waya mi kerdî binê bedenê xo nimitî. Sunguyêk raştê maneyê mi ame. Mi o pê destê xo vet. Mi kerd ke ez yewnayî pê destê xo vejî la destê mi bêhereket mend. Înan zî vat qey ez merda, mi caverda şîyî. Gama ke bi şan yew cinîya ciwane ameye vat ‘leşkerî şîyî, kam ke weşo wa wirzo we.’ Ma Hopîk de (Koyê Sipî) de qetil kerdî. Ma merdeyê xo kincanê înan ra sarisnayêne.”