Endamê Komîteya Merkezî ya PKKyî Cemal Şerîkî beşdarê bernameyê Medya Haberî bi û Darbeya 12ê Êlule ser o qisey kerd.

Qiseykerdişê Şerîkî ra tay noqtayê girîngî wina yê:

''Dewleta tirke bi rayîrê faşîzmê 12ê êlule waşt ke netewe-dewlete awan bikera, pê qirkerdişî nasnameyanê bînan çin bikera. Qirkerdişê kurdan zî armanco verên bi. La bii xoverdayîşê gerîlayan ê 1984î no armanc bi temamî ame pûçkerdene. Hemleya 15ê Tebaxa 1984î verê qirkerdiş, surgun û zulmî girewt. Yanî Hemleya 15ê Tebaxe faşîzmê 12ê Êlule ra hesab persa.

Seba ke Darbeya 12ê Êlule hol bêra famkerdene ganî AKP hol bêro famkerdene. 12ê Êlule de zîndanan de îşkence est bi, merdimî ameyêne qetilkerdene. Nika zî zîndanan de îşkence est o, merdimî yenê qetilkerdene. Her roje zîndanan ra cenazayî vejîyenê. O çax Esat Oktay est bi. Hêrişê vera tepişteyanê sîyasîyan dewam kenê û metodê neweyî yê îşkenceyî yenê ceribnayene.

O çax tepişteyê şorişgêrî ameyêne qetilkerdene, cenazayê înan ameyêne vînîkerdene. Tepişteyî ameyêne dardekerdene. Mîsal şorişgêrêkê bi nameyê Veysel Guneyî amebi dardekerdene û cenazaya ci amebî vînîkerdene. Nika zî wina yo. Serranê 90an de zî, 80an de zî  serebûtê winasênî est bîyî û nika zî est ê.

O çax zî vera cenazayanê tepişteyanê şorişgêran hêrişê barbarî est bîyî nika zî est ê. Rewşe nika hîna giran a. Çend rojî verî cenazaya Hakan Arslanî zereyê yew tewreyî de dîyaya babîyê ci. Cenazaya embaz Egîdî pê kargoyî erşawîyabî û cenazayê embazan Garzanî ra ameybî remnayane dima kişta rayîrî de ameybî definkerdene.

Naye ra faşîzmê AKP-MHPyî dezgehbîyayîşê 12ê Êlule yo. Faşîzmê AKPyî yeno a mana ke sentezê Tirk-Îslamî şexsê Erdogan û Bahçelîyî de îqtîdar de yo. Şero ke 12ê êlule de vera komelî dîyabi destpêkerdene şerê faşîzmê AKP-MHPyî yo. Ganî  merdim 12ê Êlule hol fam bikero. Senî ke Hemleya 15ê Tebaxe derbe daye 12ê Êlule ro nika zî gerîlayî danê AKP-MHPyî ro. Ganî vera faşîzmê AKP-MHPyî têkoşîn hîna bêro xurtkerdene. O çax xoverdayîşê vera faşîzmê 12ê Êlule zî do ser bikewo. Senî ke 12ê Êlule bi xo sey sebebê têkoşîn, xoverdayîş û şerî amebi qebulkerdene; têkoşîn, xoverdayîş û şerê vera faşîzmê AKP-MHPyî yo ke dewamê 12ê Êlule yo, do bibo cewabo tewr pîl ê vera 12ê Êlule.''