Komeleya Cigêrayîşê Ziwan û Kulturî yê Mezopotamya (MED-DER) vizêr raporê Merkezê Cigêrayîşanê Warê Sosyopolîtîkan ê derheqê eleqeya vera kursanê ziwanê dayîke yê kurdkî bi kombîyayîşê çapemenîye eşkera kerd.Kombîyayîşo ke banê komele de ame kerdene îdarekarê Merkezê Cigêrayîşanê Warê Sosyopolîtîkan û MED-DERî tewrê ci bîyî.

Kombîyayîş de ame vîrvistene ke rixmo ke Tirkîya mîyanê welatanê zaf ziwanan de ya bê tirkî ziwanî bînî nînê musnayene û waştişê perwerdeyê ziwanê dayîke tim rojdem de yo û wina ame vatene: ''Bi serranê dergan dezgehanê komelê sîvîlî bi kursanê ziwanê dayîke cehd kerd ke kurdkî bipawê û bide musnayene. 2012-2013 ziwanê dayîke mekteban de sey dersa vîjnayîye ameye dayene la hema waştişê perwerdeyê ziwanê dayîke nêameyo caardene. Çend şino vera kurdkî eleqe zedîyeno û kursî zafêr bene. Bitaybetî wextê pandemî de eleqeya vera kurdkî zêdîyaye. ''

Rapor kurmancî hetê  Dîlane Guvenç û kirdkî hetê Nesîp Guletekînî ra ame wendene. Rapor de bale ameye serantene ke vera kursanê kurdkî eleqe zêdîyaya û nê ameyî vatene: ''Wextê pandemî de 2020 de 292 kesî tewrê kursanê kurdkî yê online yê MED-DERî bîyî. Na humarê 2021 de bîye 397 û 2022 de  803. Kursê ke verî online û yew dewr bî nika di dewr û hem online hem zî rî bi rî yenê kerdene. Serra verêne 34 bajaranê Vakurê Kurdîstanî û Tirkîya ra û Amerîka, Ewropa, Başûr û Rojhilatê Kurdîstanî ra tewrbîyayîş bîyî. Serra dîyêne 41 bajar û emser 43 bajaran ra tewrbîyayoxî est ê. Zafê tewrbîyayoxan cinî, wendekar  û ciwan ê. Seranê verênan de zafê tewrbîyayoxan kurmanc bî, emser humara kesanê ke gorankî, dimilkî û sorankî qisey kenê zêdîyaye. ''