Mazlûm Dag û Abdurrahman Er 17ê temmuza 2019î ra nata Zîndanê Hewlêrî de tepişte yê. Er û Dag 39 rojî yo vera ferzkerdişê kincanê zîndanî grevê vêşanîye de yê û rewşa înan bena xirabêre. 

Mazlûm Dagî keyeyê xo de bi telefonî qisey kerd. Dagî pare kerd ke rewşa înan a weşîye bena xirabêre û vat: ''Îdareyê Zîndanî halê ma des rojî yo nêperseno. Ma rê vanê ke 'nêweşxane de doktor û dermanî çin ê.' Seke ma terkê mergî bîyê. Abdurrahmanî 20 kîloyî dayê. Mi zî 10 kîloyî dayê. Ma hînî nêeşkenê qisey bikerê.''

Dadîya Dagî Kudrete Dag venga rêxistinanê komelê sivîlî û rayaumûmîye da ke derheqê babete de hîsger bibê.