Artêşa Iraqî 20ê gulane ra nata kena ke dormeyê Kampa Multecîyan a Şehîd Rûstem Cûdîyî pê têlan û kuleyan bigêra. Şarê Mexmûrî 11 rojî xo vera xîretê ablûqakerdişî xoverdayîşê xo rê dewam keno.

Dengbêj Xelîl Mehmûd zî vera ablûqa xoverdayîş de yo û pê vengê xo yê zixmî moralê şarî ano ca. Mehmûd dewa Hîlalî ya qezaya Qilabanî ya Şirnexî ra yo û tedaya dewleta tirke ra serranê 90an de koç kerdo.

Mehmûdî pare kerd ke seba şarê Mexmûrî xoverdayîşî ra ber rayîrêk nêmendo û înan rê Mexmûrî ra ber cayêk zî çin o. Dengbêj Mehmûdî vat: ''Kampe de cinî, doman û kokimî est ê. Nika artêşa Iraqî ma rê zulm kena. Cara kampa ma çar serrî yo binê ambargoyî de ya. Nika zî yeno kerdene ke ma bigêrîyê binê ablûqa. La ma qetî ney qebul nêkenê.''

Mehmûdî da zanayene ke deyîrê bi kurdkî seba înan çimeyê moralî yê û venga pêro hunermendanê kurdan da ke pê deyîranê xo paştî bidê xoverdayîşê Mexmûrî.

Mehmûdî vat: ''Ganî pê kesayetî û hunermendî dormeyê yew îtîfaqî de bibê yew veng û vajê 'Ma zulmê vera Mexmûrî qebul nêkenê.'  Na kampe keda Rayber Apoyî ya û pê gonîya şehîdan ronîyaya. Wa her kes wayîrê na kampe vejîyo.''