Dêrsim de Newroze bi şîarê, “Her der Newroz, her dem azadi” dest pêkerde. Qiseykerdoxan û hunermendan rîyê şînê erdlerzê Mereşî ra kincê sîyayî kerdî piray.

DBP, HDP, TJA, Partîya Çep a Hewze , EMEP,DAD, Platformê Kede û Demokrasîyî û rêxistinanê komelê sîvîlî warê Newroze de cayê xo girewt.

Şaro ke Kuçeyê Sanatî de ame têhet heta Meydanê Seyîd Rizayî bi slogananê “Bijî Newroz”, “Bijî berxwedana zindana” û “Jin, jiyan, azadî” rayra şi. Badê rayraşîyayîşî adirê Newroze ame tavistene. 

Wekîlê HDPyî yê Dêrismî Alîcan Onlu ke tîya qisey kerd, vat: ''Senî ke Mazlûm Dogana vizêr vera Deheqan têkoşîn kerd, ewro zî têkoşîn dewam keno. Seke şima zanê nêzdî de vîjnayîş est o. Şarê Dêrsimî do qesre û saltanatê îqtîdarî sereyê ci ser birijno.''

Serekê EMEPî yê Bajarî Ergîn Tekîn zî vat: ''Vera zilmê Deheqan ewro zî Kawayê Herdemî est ê. Şarê kurdî vera tim xover dano. Newrozê hetê xeylêk şaran ra yena pîrozkerdene la bitaybetî xoverdayîş û raja newî ya kurdan a.''

Vervatoxa Partîya Hewz a Çepe Çîgdeme Kiliçgun Uçar zî kirdkî, kirdaskî û tirkî Newroze pîroz kerde û vat: ''Ma afata erdlerzî dî rîyê hukmatî eşkera dî. Felaketa laserî de zî xeylêk kesan dinyaya xo bedilnaye la wezîre îqtîdarî mijdanê dano ke herre resaya awe. Şima nika paştî danê, îqtîdarê ke şarê xo nêpawit ya zî  komelo ke newe ra cuye înşa keno? No îqtîdar gerek bêro wardayene. Vera polîtîkaya şer û tecrîdî, çareserî rayîrê hîrêyinî de ya.''

Aktîvîte bi deyîranê lawikanê hunermendanê herêmî û hunermend Kadîr Çatî qedîyaye.