Şarê herême rê gefî yenê wendene û şar seba ke binê tedayan de yo nêeşkeno beşdarê aktîvîteyan bibo. Bi taybetî zî bi ÎŞKUR’î şarî rê gefan wanenê û kesê ke beşdarê aktîvîteyanê Yewîya Hêzê Şorişgêrî ya Dêrsimî benê zî bi bêkarîye yenê tehdîdkerdene.

Xebatkarê çapemenîye yê ke xebatanê Yewîya Hêzê Şorişgêrî ya Dêrsimî teqîb kenê zî nê tedayan ra nesîbê xo gênê, plakayê wesayîtanê înan yenê girewtene û dîmenê înan yenê antene.

Çend hewteyî naye ra ver, reyna qezaya Qisle de afîşê kirmanckîyî amebî dardekerdene û nê afîşan de ‘Ye mao’ amebî nuştene. La hêzanê dewlete bi îdîaya ‘propagandaya Mao Zedungî kenê’ nê afîşî arêdaybî. Reyna beyraqê Partîzanî zî arêdayî û bi no qeyde tedayî her ke şî bîyî zêde. 

Ozkan Aslan seba ke aktîvîstê xozaye bi, xeylî xebatî kerdê û no sebeb ra zî namzedîya ci ameyebî astengkerdene. La Aslan wina vano: ”Cayo ke tede Hizir Paşayî estê, ganî merdim uca bibo Pîr Sultan.” Aslan vano merdimî binê tedayê giranî de yê û nê tedayî tena wextê weçînayîşî de nê, her wext yenê kerdene û cugehî tim yenê gaspkerdene.

Namzeda hemserekîya Şaredarîya Qisle Rahîme Kizilkane no derheq de wina vana: ”Qisle mekanê Dûzgin Bavayî ya, Ocaxa Kurêşan a. Ma seba kultur û îtîqatê xo cehd kenê. Ma vera asîmîlasyonî mucadele kenê û ma do bikerê zî.”

Reyna namzedê hemserekîya Şaredarîya Qisle Fevzî Gîrîş zî wina vano: ”Mucadeleyê ma do her het ra dewam bikero. Bi arêdayîşê pankart û afîşanê ma nêeşkenê verê ma bigîrê. Ma xebetînê û ma do hîna zêde bixebetîyê zî.