Yewîya Hêzî ya Şorişgêre ya Dêrsimî hadreyîya xo ya sindoqan kerde  û şarî ra waşt ke reyanê xo bişuxulnê û sindoqan rê wayîr vejîyê.

Dêrsim merkez o ke 27 hezar 17 weçînitoxî estî, temamî de do 97  sindoqî bêrê ronayene. Partîya Şaran a Demokratîke (HDP) ya ke bi Yewîya Hêzî ya Şorişgêre ya Dêrsimî kewena weçînitişî  hema hema semedê heme sindoqan muşahîtê xo bewlî kerdî û 17 mektebê ke tede rey do bêrê şuxulnayene de berpisîyarê xo ca kerdî.

Berpisîyaranê Yewîya Hêzî ya Şorişgêre ya Dêrsimî ra Îbrahîm Kasûnî vat ke derheqê asayîşê sindoqan û tedbîrê ke do bêrê girewtene de înan hadreyîya xo dîya tay mendo ke karê înan biqedîyo. Kasûnî  waşt ke şar semedê muşahîtî muracat bikero û va,‘‘Ma semedê asyîşê sindoqan perwerde da berpisîyaranê mekteban, wezîfedaranê sindoqan û muşahîtan. Dêrsim semedê 31’ê Adare hadre yo. Ma do sindoqanê xo zaf hole bipawê. Ma do şaredarîya ma ke ameya xespkerdene , reyna bikê şaredarîya şarî. Wa şarê ma wayîrê reyan û sindoqanê xo vejîyo. Ma do serkewtişê xo 31’ê Adare de pîroz bikê.

Baroya Dêrsimî zî semedê teqîpkerdişê weçînitişî  Merkezê  Teqipkerdişê Weçînitişî yê Asayîşî rona.