Platformê Kede û Demokrasî yê Dêrsimî bi wesîleya 1ê Êlule Roja Haştîye ya Dinya Kuçeyê Hunerî ra ver bi Meydanê Seyîd Rizayî çalakîya rayraşîyayîşî kerde û dima zî eşkerayîye daye. Eşkerayîye hetê Serekê Baroyê Dêrsimî Kenan Çetînî ra ameye wendene. Çalakîye de pankarta 'Şarî şerî nê haştîye wazenê' ameye akerdene.

Çetînî vist vîrî ke sebe keyeyê Şenyaşarî û Gulîstane Doku raştê ci ameyî neheqîyê vera şaran zêdîyenê û şarî hînî têdûştî, edalet û azadîye wazenê. Çetînî vat: ''Ma venga şaran danê ke kişta têkoşînê elewîyan û kurdan de ca bigêrê. Ganî verê haştîye û dîyalogan bêro kerdene, polîtîkaya înkar û redî biqeda.''

Wekîlê HDPyî yê Dêrsimî Alîcan Onluyî zî çalakîye de qisey kerd û vat: ''Şer mabênê şaran de nê mabênê emperyalîstan de yo. Ma vera sîyasetê şerî ganî demokrasî û haştîye aver berd. O çax ma eşkenê cuya têdûşt û azade awan bikerê.''