Polîsanê tirkan Amed de dest na rojnameyê kurdkî Xwebûnî ser. Wayîrê Îmtîyazî yê Xwebûnî Kadrî Esenî ard ziwan ke no kerdiş kerdişê serranê 90an o û venga şarî da ke wayîrê rojnameyê Xwebûnî vejîyo.
17ê êlule de polîsanê dewleta tirke Termînalê Otobusan ê Amedî de bêsebeb dest na Rojnameyê Xwebûnî ser ke rojnameyî ameyêne erşawitene Mersînî.
Wayîrê Îmtîyazî yê Xwebûnî Kadîr Esenî derheqê babete de Ajansê Mezopotamya rê qisey kerd û pare kerd ke heqê agahdarbîyayîşî yê şarî yeno astengkerdene. Esenî îfade kerd ke derheqê destsernayîşî de qet agahîye nêdayîye înan.
Esenî vat: ''Serranê 90an de dewlete dest nayêne rojnameyanê kurdkî ser. Beno ke naye ra pey zî bêagahî û bêsebeb polîsî dest nanê rojnameyan ser. No têna meseleya rojnamegeranê kurdan nîya. Ganî şarê kurdî vera nê tedayan tewirê xo bimojno û verê tedayan bigêro. 30 serran ra pey serrgêra qetilkerdişê Apê Musayî de Kurdîstan de seba ke kurdkî yo dest nîya rojnameyêkî ser. Armancê ney no yo ke Kurdîstan de rojnamegerîye bêra astengkerdene. La wa hol bizanîyo ke rojnamegerîya kurdkî binê her şertî de do dewam bikera.''
