Dewanê Tonekrak, Pirejman, Berig û Tirmalî yê qezaya Pîranî yê Amedî de dekewtiş û vejîyayîşî 2015 ra nata hetê leşkeran ra yenê astengkerdene û 2009 de zî nê dewî sey herêma asayîşê taybetî ameybî îlankerdene. Dewijî têna eşkenê mabênê saetanê 07.00 û 17.00 de dekewtiş û vejîyayîşî bikerê.

Dewijan Ajansê Mezopotamya rê pare kerd ke ê qedexeyan û ablûqa ra mexdûr benê û waşt ke hînî ablûqa bêra wedaritene.

Dewa Tonekrakî ra Kadrîye Karata vat: ''Wexto ke hewa beno wenik dewijî seba kar û gureyî şinê dewe. Qedexe ra ma nêeşkenê gureyanê xo bikerê. Ge ge nêweşê ma benê la qedexe ra ma nêeşkenê şorê nêweşxaneyan û nêweşê ma mirenê. Herême de her serre daristanî yenê vêşnayene. Qereqol ney keno. Leşkerî guleyan erzenê derûdorî. No hem seba ma hem zî seba gandaranê xoza tehluke yo.''

Kadrîye Karata îfade kerd  ke ceyran zî nêdîyeno dewanê înan û vat: ''AKPyî weçînayîş de propaganda kerde ke 'do keyeyêk zî bê ceyranî nênamo.' La ceyranê ma çin o. Çimeyê ma yê awe zî sondajê bîranê qereqolî û bombardumanan ra kêmîyayî. Têna di çirikê ma mendê. Ma nêeşkenê xo rê baxçe bikerê. Qedexeyan ra ma nêeşkenê heywanan zî weye bikerê. Çunke ma nêeşkenê heywanan vejê teberê dewe biaçarnê.'' 

Habîbe Karatekeya ke merkezê şaristanî de ciwîyena la hamnana yena dewe vat: ''Wexto ke nêweşê ma est bê ma gêrenê mixtarî, mixtar gêreno taburî, tabûr zî gêreno cayê bînî. Heta ke ambulans bêro nêweşê ma mirenê. Dadîya mi nê semedî ra wefat kerd. Wa rayîrê ma abikerê, çira rayîrê her kesî akerde yo la ê ma girewte yo? Şewan ma binê tarîye de yê, pê panelanê tîje hewcedarîyanê xo anê ca ke o zî qîm nêkeno. Awa ma çin a, ma çita biremê beno wişk.''