Şaredarîya Çewlîgî ya AKPyî 2013 de mîyanê dewanê Herragor, Havsel, Kardeşler û Qenterî yê Çewlîgî de Warê Depokerdişê Çopan viraştbi. Dewijan vat ke depoyê çopan beno sebebê nêweşîyan û waşt ke depo bêro wedaritene.

Dewijî vera depoyî bi kampanyayêke îmzayan arê danê. Îdarekaranê kampanya ra Cemîl Belîren îfade kerd ke 2 mengan de 36 domanî depoyî ra nêweş kewtê û çar dewan de 'enfeksîyonê gonîya sipîye' vila bîyo. Belîrenî ard ziwan ke doktoran vato ke sebebê enfeksîyonî gemarîya herême ya. Belîrenî vat: ''Tesîsê çopan zerar danê daran û genimî.''

Belîrenî da zanayene ke tesîs qasê 400 metre dûrê dewa Kardeşlerî de yo û çopanê Çewlîgî ra ber çopê qezaya Depe ya Xarpêtî û qezaya Licê ya Amedî zî nê tesîsî de verdîyenê. 

Belîrenî pare kerd ke tesîs seba 29 serran pê îhale dîyayo û vat: ''Goreyê şertanê Rêxistina Weşîye ya Dinya ganî no tesîs qasê 22 kîlometre dûrê waranê cuye de bibo. Wexto ke ma waştişnameyî dayî şîrkeye qala mesafeyêka 250 metreyî kerde. Coka ma dest pê kampanya kerd. Ma heta nika 6 hezar îmzayî arê dayî û hedefê ma 20 hezar îmzayan o. Ma wazenê wa çopî bêrê wedaritene. Ma nêeşkenê tîya de zîretî bikerê. Domanê ma nêweş kewenê.''