Temsîlkarê PYDyî yê Başûrê Kurdîstanî Dr. Cawîdan Kemalî derheqê weçînayîşanê 14ê gulane û tesîranê netîceyanê ci de ANFyî rê qisey kerd.

Dr. Kemalî bale ante ser ke weçînayîşê 14ê gulane weçînayîşê tarîxî yê û vat: ''Îqtîdarê Erdoganî Sûrîye, Rojawan û herême de polîtîkaya îşxalî ano ca coka seba herême tehlukeyêko pîl o û verê çareserîye gêno. Erdogan paştî dano komanê terorîstan. Coka eke Tirkîya rê demokrasî bêra no do tesîrê pêro herême bikero.''

Dr. Kerîmî îfade kerd ke kurdî çar parçeyanê Kurdîstanî de dînamîkê demokrasî yê û eke muxalefetê Tirkîya wexto ke îqtîdar bibo verê qewimîyayîşanê demokratîkan abikero, no zî do tesîrê pêro parçeyanê Kurdîstanî bikero.

Dr. Kemalî dîyar kerd ke Erdogan keno ke pêvînayîşanê bi Esadî ra seba weçînayîşan avantajêk bivisno destî. Dr. Kemalî vat: ''Multecîyê sûrîyeyîjî rojdemê muxalefetê Tirkîya de yê. Rejîmê Erdoganî hînî keno ke ney rê çareserîyêke bivîno. La mi çimî de pêvînayîşê Anqara-Şamî wina lez netîceyêke do nêdê. Çunke nê pêvînayîşan de teyna menfaetê wird rejîman rojdem de yê. Seba ke îşxalê Rojawanî dewam keno nê pêvînayîşan ra netîceyêke nêvejîyena. Krîzê Sûrîye ancax waştişê şaran bêrê caardene qedîyeno. Ganî Sûrîye de esasê demokrasî de sîstemêk bêro awankerdene û azadî û heqê kurdan bigêrîyê binê demokrasî. Pêro şarî eşkenê dest bidê destî û Sûrîye newe ra înşa bikerê.''