YNK, Îdareyê Xoserî û Serfermandarê QSDyî Mazlûm Ebdî zî tede xeylêk partî û temsîlkaranê hukmatê Iraqî vera hêrişê dewleta tirke yê serê Meydanê Teyarayan ê Silêmanî nêrazîbîyayîşê xo mojna.

Fermandarê Pêroyî yê QSDyî Mazlûm Ebdîyî twitterî ser o hêriş şermezar kerd û vat: ''Ma hêrişê Tirkîya yê vera Meydanê Teyarayan ê Silêmanî şermezar kenê. Binpaykerdişê vera Iraq û Sûrîye dewam kenê. Seba ke YNK paştî dano kurdanê Rojawanî tira acîz a. Ma do têkilîyanê xo yê wayûbirayanê xo yê Silêmanî rê dewam bikerê.''

Polîtburoyê YNKyî zî bi eşkerayîyêke rexne kerd ke PDK nê hêrişê dewleta tirke keno meşrû. YNKyî da zanayene ke no hêriş vera serdestîya erdî ya Başûrî binpaykerdişêk o û netîceya xebatanê hemkarîye û ajanîye de qewimîyayo. YNKyî vat: ''Mîyanê PDKyî de kesê ajanî est ê. Nê kesî dewletanê bînan reyde kenê ke aramîya Herêma Kurdîstanî û Silêmanî bixeripnê.''

Serekkomarê Iraqî Letîf Reşîdî bi eşkerayîyêka nuştekîye pare kerd ke dewleta tirke serwerîya erdê Iraqî binpay kena û terorîzmî kena. Reşîdî vat: ''Dewleta tirke wa uzrê xo biwaza. Eke nê hêrişî dewam bikerê ma do tewirêkê cidîyî bimojnê.''

Hetkarê Serekwezîrê Herêma Kurdîstanî Kubat Telabanîyî eşkerayîya xo de vat: ''Nê hêrişî hem sivîlî hem zî serdestîya erdê Iraqî kerdî hedef.'' Telabanîyî bale ante eşkerayîya Cotyar Adilî ser û vat ke Adil vervatoxê Hukmatê Kurdîstanî nîyo coka nêeşkeno hukmatî ser o qisey bikero.

Hemserekê PDKyî Cotyarî YNK û Silêmanî kerdbî hedefê dewleta tirke.

Serekkomarê verênî yê Iraqî Berhem Salihî, Serekê Tevgera Fetîhî Hadî Amirî, Wekîlê Fraksîyonê Komeleya Edîlî Soran Umerî, Hetkarê Serekê Parlamentoyê Iraqî Muhsîn Mendelawîyî zî hêrişê dewleta tirke şermezar kerd.

Îdareyê Xoserî yê Rojawanî zî bi eşkerayîyêke tewirê xo mojna û îfade kerd ke Erdogan seba ke weçînayîşan de ser bikewo, reyna hêrişê kurdan keno. Îdareyê Xoserî eşkerayîye de ard ziwan ke ê do tim destek bidê YNKyî û îdareyê Silêmanî.