Endama Komîteya Rayberdişî ya PKKyî Xalîde Engîzel qala Endamê Komîteya Merkezî ya PKKyî Qasim Engîn kerde ke 27ê gulana 2020î de şehîd bibi.

Engîzeke wina qala Kasim Engînî kerde:

''Ez şexsê embaz Kasimî de pêro şehîdanê menga gulane û şehîdanê têkoşînî bi rêzdarî yad kena. Emser serrgêra 3. ya şehadetê embaz Kasimî ya. Embaz Kasim embazêko winayên bi ke domanîya xo ra nata perwerê erjanê welatperwerîye û erdê xo bi. Embaz Kasim Ewropa de pîl bîyo la sey kadroyêkê partîye ame warê Rayberîye, tewrê perwerdeyî bi û derbazê waranê gerîlayan bi. Ey qasê 30 serrê xo dayî têkoşînî. Ey mesuldarî û erkê girîngî ardî ca.

Embaz Kasimî wextanê tewr giranan de têkoşînêko pîlêr kerd. Ey vera xeta tasfîyeker, dişmenî, hêrişanê dişmenî têkoşîn kerd. Wexto ke ma pîya xebitîyayêne tim ey ra hêz girewtêne. Ey xeta partî û Rayberîye de xo zelal kerdbî, taybetmendîyê milîtanîya Apogîre kesayetê xo de mojnabî. Coka merdim eşkeno vajo ke embaz Kasim şorişgêrêko raştikên bi.

Embaz Kasimî tim wendêne, cigêrayêne, bi taybetî serê kurdan û Kurdîstanî tarîx û cografya xebitîyayêne. Ey kamca de bi karê perwerdeyî bi hawayêkê sîstematîkî kerdêne. Ey perwerdeyêko xurt dayêne milîtanan, kadroyanê partîye û şerwanan. Ey serkêşîya karanê çapemenîye zî kerdêne. Ey karê çapemenîye çarçewa krîteranê îdeolojîkan de aver berdî. O hunermendêk, sporwanêk zî bi. Ey her ca de govende girewtêne, deyîrî vatêne, şîîrî wendêne. 

Embaz Kasim Engîn embazanê cinîyan rê zî embazêko ercîyaye bi. Ey bi fikranê Rayberîye xo resna camêrdê azadî. Ey embazîya xo ya bi cinîyan de bi hawayêkê ercîyayeyî xo nêzdî kerdêne. Ey çarçewa îdeolojîkî û rêxistinîye de babeta cinîyan ercnayêne. Ez pê sereberz a ke hetê ey de têkoşîn kerd.

Her ke partîya ma bena pîlêr erj û xeta şehîdanê ma zî benê pîlêr. Sey embaz Kasimî ma do her hele de wayîrê têkoşînê ey û vîrameyîşê ey vejîyê. Zehmet o ke herinda ci bêra dekerdene. Ma reyna embaz Kasimî bi rêz û minetî yad kenê. No têkoşîn heta servistişê armancanê şehîdan do dewam bikero. Ma reyna şexsê embaz Kasimî de şehîdanê azadîye bi rêzî yad kenê.''