Endama Komîteya Merkezî ya PKKyî Xalîde Engîzek radyoyê Dengê Welatî rê qisey kerd û rojdem ercna.

Qiseykerdişê Engîzeke rê tay noqtayî wina yê:

''Hêzanê Modernîteya Kapîtalîste wexto ke hêrişê Rojhelatê Mîyanênî kerd, înan PKK û Rayberîye xo rê sey astengî dîyî û Komployê 15ê Sibate kerd. Komployo diyîn zî armanc keno le Başûr û Rojawanî biqedîno. Nê hêzî reyna PKKyî sey astengî vînenê û coka hêrişê ci kenê. Dewleta tirke seba ke planê nê hêzanê hegemonîkan bîyara ca têgêrena; pere, çêrîye û çekanê xo zî NATO ra gêna. Herême de zî hukmatê Iraqî û PDKyî ra destek gêna. Nê esasî ser o dewleta tirke hêrişê Herêmanê Pawitişî yê Medya kena.

Dewleta tirke wazena Zap, Avaşîn, Metîna, Xakûrkê û Heftanînî ra dima zî Garê û Qendîlî îşxal bikera. Eke dewleta tirke gerîlayan tasfîye bikera, PKKyî zî tasfîye kena û bi nê hawayî hêvîya şaranê Rojhelatê Mîyanênî çin kena. Mîyanê nê konseptê şerî yê Tirkîya de NATO, Amerîka, IRaq est ê. Eke PKK bêro çinkerdene Tirkîya do Iraqî îşxal bikera û bi taybetî Mûsil û Kerkûkî bivisna destî. Hukmatê PDKyî zî mîyanê nê konseptî de yo. Tirkîya Sûrîye de zî, Rojhelatê Mîyanênî de zî polîtîkaya îşxalî ana ca. Dewleta tirke wazena herême newe ra dîzayn bikera, kurdan ancî bêstatu war verda. Verê çimanê dinya de dewleta tirke vera gerîlayan çeka kîmuyewîye xebitnena. Tirkîya her çi nameyê NATOyî ser o kena coka NATOyî ra hesab bêro persayene. 

Xora gerîlayê HPG û YJA-Starî vera nê hêrişan bi hawayêkê destanwarî xo ver danê. Şarê ma zî hetê gerîlayan de bi şerê şarî yê şorişgêrî rêxistin bikerê. Ma venga şarê kurdî danê ke wurzo payan ser, her ca de vera hêrişan xo ver bido, derbe bido dewleta tirke. Ganî ciwanî xo sey gerîlayan bivînê û têkoşînêkê topyekûnî bikerê. Eke dewleta tirke nê şerî de ser bikewa îqtîdar do hukmê xo rê dewam bikero la eke bin bikewa do hesab bida şaranê herême.  Coka wa her kes mesuldarîya xo bîyaro ca.

Ganî şarê kurdî PDKyî hol bişinaso. A raşte çîyê sey 'Hukmatê Başûrî' çin o hukmatê Barzanîyan est o. PDK yanî Keyeyê Barzanîyan Saddamî ra zêdêr dîktator o. Tarîxê PDKyî de tim îxanet est bi. Tewr peyênî zî PDKyî PKKyî rê îxanet kerd, rolê xo ard a. PDK keno ke Şingal de êzidîyî û erebî şer bikerê. PDK Şingal keno veng û şarî şaweno kampan. PDK nê konseptê şerî de zî rayîrê dewleta tirke akeno, PDK kincanê pêşmergeyan dano leşkeranê tirkan, kişteyanê dewlete arê dano, erzaq dano leşkeran yanî îxanet keno. Wa şarê kurdî bizano ke PDK mîyanê konseptê dewleta tirke de ca gêno û keno ke Zap de PKK bin bikewo. Dewleta tirke do firsendê verênî de PDKyî ra bixelisîya. 

Ma vanê ke no şer şero peyên o. Erdogan armanc keno ke serrgêra 100. ya Peymana Lozanî de kurdan bêstatu war verdo, PKKyî çin bikero û îqtîdarê xo mende bikero. Botan, Serhed, Amedî ra heta Dêrsimî ciwanê Kurdîstanî xo sey gerîlayan bivînê û debre bidê dişmenî ro. Ganî kurdê wayîrwijdanî vera dewlete têbigêro. Şarê ma yê Başûrî zî wa vera îşxalê dişmenî hîna zaf nêrazîbîyayîşê xo bimojno. Wa şarê ma wayîrê xoverdayîşê gerîlayan vejîyo. Eke şarê Kurdîstanî bi rol û mesuldarîya şerê şarî yê şorişgêrî têbigêro, gerîlayî qetî do ser bikewê.''