Dêrsim de wextê îqtîdarê AKP-MHPyî de polîtîkayanê şerî ra krîzo ekonomîk asta tewr berze de zêdîya. Esnafanê Dêrsimî derheqê babete de Ajansê Mezopotamya rê qisey kerd û waşt ke 14ê gulane de îqtîdar bêro vurnayene.

Esnaf Cîhan Hoşogluyî pare kerd ke şer, binpaykerdişê heqanê merdiman û demokrasî krîzê ekonomîkî giranêr kenê. Hoşogluyî vat: ''Nê îqtîdarî şerê konseptî kerd xorinêr coka ma mîyanê krîzê ekonomîkî de mendî. Seba ke ma herême ra nêeşkenê xo bi xo îdare bikerê pêro krîzî hêverî tesîrê ma kenê. Seba ke ma konseptê şerî ra bixelisê ganî no îqtîdar şoro. Perspektîfê vurnayîşî Partîya Çep a Keske de yo.'' 

Esnafe Songule Yildirim vat: ''Ez hînî nêeşkena pereyo ke yeno û pereyo ke şino mabênê înan de eyar bikera. Pereyo ke mi ra şino zaf zêdîyyao. Ma hînî nêeşkenê lazimîyanê bingeyînan bigêra. Hînî vurîyayîş şert o.'' 

Bulent Yukselî vat: ''Ma nê 21 serran de teyna vêşanîye musayî. Ma bîyê muhtacê pîyazî. Ge ge ez vêşan-têşan manena. Seba şaranê Tirkîya vurnayîş do hol bibo. Wexto ke şino sindoqî ser ganî her kes hesabê xo hol bikero.'' 

Halîde Erka ke 30 serrî yo esnaf a vat: ''Çîyo ke serê sibayî ma 100 lîra ra roşenê, nêmroje ra pey beno 130 lîra. Muşterîyî zî şaş benê. La ma nêeşkenê xo biresnê cayêkî. Wa hînî no îqtîdar şoro. Wa bêkarîye biqeda.'' 

Sanîye Îldenîza ke maydanozî roşena vat: ''Maydanoz 7 lîra yo, kîloyêkê pîyazî 30 lîra yo. Pereyê mi çîyêkî rê nêvejîyeno. Mi rê rojêke de 2-3 lîra maneno. Pê aye zî ez pereyê kira kena pêser.  Ma mîyanê tengîyêka pîle de yê. Ma verê cû lastîko sîya pay kerdêne la o zî bîyo 450 lîra. Wa îqtîdar bêro vurnayene. Ez do raya xoo bida ê kesanê ke zûran nêkenê, cîyakerîye nêkenê û ma ra yê.''