Merkezê Îrtîbatî û Çapemenîye yê HPGyî bîlançoya şerî ya mabênê 1ê nîsane-30ê nîsane eşkera kerde.

Eşkerayîye wina ya:

''Hêzê pawitişî yê şarê ma gerîlayê azadîye yê Kurdîstanî rixmê şertanê tewr zoran zî erdê Kurdîstanî vera hêzanê kolonyalîstan bi fedayîtî pawenê. Rejîmê AKP-MHPyî yo faşîsto ke dişmenê kurdan o, pê pêro îmkananê xo hêrişanê xo rê dewam keno. Rejîmo faşîsto ke warê sîyasî û ekonomî de rijîyayo, keno ke pê çinkerdişê îradeyê kurdan payan ser de vindero. Rixmê nê hêrişan zî gerîlayanê ma xeta xoverdayîşî xorin kerde, bi fedayîtî şer kerd, rayîr nêda kolonyalîstan û bi xoverdayîşê xo tarîx nuşt.

Rejîmê AKP-MHPyî yo ke çinkerdişê kurdan ser o estbîyayîşê xo nayo ro, bi nêzdîbîyayîşê weçînayîşan hêrişê xo zêdînayî, pê xeberanê zûran û hîkayeyanê sexteyînan keno ke netîce bigêro. Mêrdînî ra heta Botanî, Botanî ra heta Sehedî Vakurê Kurdîstanî de rejîmê AKP-MHPyî bi hezaran hêrişê îşxalî kerdî la rixmê ney zî verê gerîlayan de ser nêkewt.

Herêmê Pawitişî yê Medya 1081 reyî dîyayî bombayan ver

Goreyê tesbîtanê hêzanê ma Herêmê Pawitişî yê Medya 76 reyî pê teyarayanê şerî, 61 reyî pê helîkopteranê hêrişî, 944 reyî pê tank, obus, top û çekanê giranan 1081 reyî dîyayî bombayan ver. Artêşa îşxalkere mewzîyê xoverdayîşî yê gerîlayan 8 reyî pê çekanê kîmyewîyan û bombayanê qedexekerdeyan dayî bombayan ver. Rejîmo ke verê rijîyayîşî de yo bi hawayêkê bêperwayî sûcê şerî yê winayênî keno. Hêzanê ma çarçewa xopawitişî de cewab da hêrişanê îşxalkeran û tay pêkewtişî qewimîyayî. Netîceya ney de 2 îşxalkerî kişîyayî, 1 kameraya mobese û yew topê 57 kîloyî ameyî îmhakerdene.

Gerîlayê azadîye yê Kurdîstanî yê ke hêvîyê pêro cinî, ciwan û bindestan ê, hêvîyanê ameyoxê azadî yê şehîdanê ke vera îşxalkeran heta nefesê xo yê peyênî şer kerdo, gandar verdenê. Embazê ma Xebatkar Bagok, Bager Wan, Hêjar Zozan, Rosîda Bawer, Ekin Rizgar Malazgirt Vakurê Kurdîstanî de û embaz Botan Goyî zî Herêmanê Pawitişî yê Medya de, menga nîsane de şehîd bîyî û înan pê xoverdayîşê xo yê rûmetênî tarîxî ser de nameyê xo nuştî. Gerîlayanê azadîye yê Kurdîstanî mîrasê Dilxwaz Gabar û Gulçîya Gabaran dewr girewt û armanc kerd ke nê mîrasî biresnê serfîrazîye. Gerîlayê azadîye yê Kurdîstanî do rayîrê şehîdan de û xeta Apogîran de bêteredut têkoşîn bikerê û dewaya azadîye pê serfîrazî tacîdar bikerê.''