Komîteya Rayberdişî ya PKKyî bi wesîleya 18ê Gulane Roja Şehîdan a Kurdîstanî eşkerayîyêke daye. Eşkerayîye wina ya:

''Seke zanîyeno têgêrayîşê azadîye reya verên 18ê gulana 1977 de Dîlok de embaz Hakî Karer şehîd da. Xoverdayîşê azadîye û partîya ma seba vîrameyîşê şehîdê verênî Hakî Karerî awan bîyî. Rayber Apoyî seba embaz Hakî Karerî vatbi 'O seke ruhê min o nimite bi.' 19ê gulana 1978î de ma Hîlwan de embaz Halîl Çagun şehîd da. Şanê 17ê gulana 1982î de çalakîya xoverdayîşê tarîxî yê Çaran qewimîya ke Zîndanê Amedî roşnî kerd. 16ê gulana 1997î de nêzdîyê 70 embazê ma Hewlêr de hetê PDKyî ra ameyî qetilkerdene. Her roja gulane de ma şehîdî dayî. Coka gulane bîye 'Menga Şehîdanê Kurdîstanî.' 18ê Gulane zî bi 'Roja Şehîdanê Kurdîstanî.'

Ma sey têgêrayîşê azadîye yê Kurdîstanî û şarê kurdî kewenê 18ê gulane. Serrgêra 46. ya şehadetê ci de ma embaz Hakî Karer bi rêz, minet û hûrmetî yad kenê. Şexsê ey de ma pêro şehîdanê xo yê qehremanan yad kenê û soz danê ke armancanê înan ser bivisnê û wayîrê vîrameyîşanê înan vejîyê. Ma Rayber Apoyo ke xo sey 'Vervatoxê Şehîdan' pênase keno selam kenê. Ma qetî serra 47. ya têkoşînî de xeta Rayberîye û Şehîdan ser bivisnê.

Seke zanîyeno menga gulane de şehîdê pîlî yê têgêrayîşê azadîye yê Tirkîya zî est ê. Nê esasî ser o ma şexsê Îbrahîm Kaypakkaya û Sînan Cemgîlî de pêro şehîdanê têkoşînê demokrasî û sosyalîzmî yê Tirkîya bi rêzdarî û minetî yad kenê. 

Pêro averşîyayîşî û destkewteyî oxirê şehîdan de, xeta şehîdan de ameyî destvistene. Dewaya Azadîya Kurdîstanî bi nê hawayî pîl bîye. Çimeyê ma yê hêzgirewtişî yo tewr pîl şehîdê ma yê. Şehîdê ma hêzê tewr bingeyî yê ke ma perwerde kenê, rêxistin kenê. Ê vizêr, ewro û sibayê ma yê. Şehîdî tim serkêşî û fermandarîya têkoşînê azadîye kenê. Eke ma xeta şehîdan de bi raştî şorê do ser bikewê. 

Sey têgêrayîş û şarî ma do xo tim xeta Rayberîye û şehîdan de perwerde bikerê û vera dişmenî şer bikerê. Ma do serkewtişanê neweyan û hîna pîlan biafernê. Netîceyê weçînayîşî yê 14ê gulane mojnenê ke ganî vera sîyaset û hişmendîya faşîste-qirkere têkoşînêko bêmabên û hîna bitesîr bêro kerdene. Bêguman ma do goreyê ney têbigêrê û seba rijnayîşê faşîzmî, seba şiknayîşê tecrîdî û bingeyê azadîya Rayber Apoyî de seba azadkerdişê Kurdîstanî û demokratîkkerdişê Tirkîya her ca de ma do xoverdayîşê antî-faşîstî bi xurtî aver berê.

Sey têgêrayîş, şarê ma û dostanê kurdan ma serê nê bingeyî de roj û menga şehîdan pêşwazî kenê. Seba ke ma bieşkê nê têkoşînî de ser bikewê ganî ma raştîya şehîdan û Rayberîye hîna zaf fam bikerê û bîyarê ca. Ganî ma xeta şehîdan û Rayberîye de hîna zaf xo rêxistin û perwerde bikerê.

Nê bingeyî ser o ma venga pêro embazanê partîye, şarê xo yê welatperwerî, dostanê xo yê demokratîkan danê ke xeta şehîdan û Rayberîye de rexneyanê xo hîna zaf bidê, xo newe bikerê û raştîya şehîdan fam bikerê. Seba şehîdan çalakîyan bikerê, şehîdgehan zîyaret bikerê, wayîrê şehîdan vejîyê, xeta şehîdan de şorê, dişmenê faşîstî bin bivisnê, cuyêka azade bi xurtî awan bikerê.''