Endama Komîteya Rayberdişî ya PKKyî Hêlîne Umît Bernameyê Taybetî yê Medya Haber TVyî de qala şerê gerîlayan û tesîrê ney ê serê weçînayîşan kerde.

Qiseykerdişê Hêlîne Umît ra tay noqtayê girîngî wina yê:

''Gerîlayanê YJA-Starî û HPGyî morê xo da binê xoverdayîşê emserînî. Eke nika ma qala weçînayîşî kenê, no xêrê xoverdayîşê gerîlayan ra yo. Gerîlayê azadîye garantorê têkoşînî yê. Eke Zap, Avaşîn, Metîna û Heftanîn de verê dişmenî nêameyêne girewtene beno ke weçînayîşî zî nêameyêne kerdene. Ma zaf bedelî dayî, xeylêk embazê ma şehîd bîyî la ma kerd ke AKP-MHP bêro verê rijîyayîşî. Rixmê bira ma ya çalakînêkerdişî dî dewleta faşîste her ca de hêrişanê xo rê bêmabên dewam kena. Gerîlayî çimeyê esasî yê têkoşînê demokrasî û azadîye yê. Coka dewleta tirke hende gerîlayî kerdê hedef.

Weçînayîşê 14ê gulane zaf krîtîk ê. Bêguman provakasyonê AKP-MHPyî yê ke nika yenê kerdene do dewam bikerê. Ganî çew nêterso. AKP-MHPyî destê ci ra çi ame xora kerdo. Nika Erdoganî rê bîyo derd ke kurdî çira raya xo do bidê Kiliçdarogluyî. Coka hêrs bîyo û wazeno her kesî teslîm bigêro. 10 serrî yo ma şerê rijnayîşê faşîzmê AKP-MHPyî kenê. Eke ewro do rijîyo, no do pê destê ma bibo. Kurdî, hêzê demokrasî, rayîro hîrêyîn do faşîzmî birijnê. Yanî wa çew kurdan sey hacetêkî nêvîno. AKP hem propagandaya 'PKK qedîyayo' keno hem zî tay kesan pê têkilîya bi PKKyî sûcdar keno. AKPyî înadê kurdan, înadê Rayber Apoyî û înadê PKKyî ancax nika fam kerd.

Ez cografyaya Dengizê Reşî de bîya pîl. Wextê AKP-MHPyî de cografyaya Dengizê Reşî ameye çinkerdene. Ez venga merdimanê Dengizê Reşî, lazan dana ke wa abigêrê nasnameyê xo ser. Çew mecbûr nîyo ke bibo tirk. Wa kurdî, tirkî, lazî çerkez û pmakî yew binê û nasnameyê xo bipawê. Ez venga pêro şaranê Tirkîya dana ke wa nê weçînayîşan de wayîrê erjanê xo vejîyê. Îtîfaqê Kede û Azadîye eşkeno nasnameyê her kesî temsîl bikero. Coka wa her kes paştî bido nê îtîfaqî.

Weçînayîşanê 14ê gulane de bi taybetî ciwanî do rolêkê pîlî kay bikerê. Ciwanî pê hîkayeyanê qehremanîye pîl bîyî. Wa ciwanî wayîrê erjanê xo vejîyê, tewirê xo yê sîyasîy bimojnê. Wa her kes nê weçînayîşanê tarîxîyan de mesuldarîya xo bîyarê ca. Rejîmê AKP-MHPyî keno ke dek û dolaban bikero, provokasyon bikero, kurdan bido qirkerdene. Wa her kes pê ney hişyar bo. Faşîzmê AKP-MHPyî qetî do birijîyo. Ez venga pêr cinî, ciwan, şaran, kurdan, hêzanê demokrasî, bindestan û elewîyan dana ke nê esasî ser o bi xurtî tewrê weçînayîşan bibê. Her kesî rê serkewtiş wazena.''