Fermandarê Yewîyanê Xoverdayîşê Şingalî (YBŞ) Pîr Çeko (Seed Ali Bedel) yo ke vizêr netîceya hêrişê droneyanê çekdaran ê dewleta tirke de şehîd bibi, bi merasîmêkê xurtî ame definkerdene.

Cenzaya Şehîd Çekoyî Nêweşxaneyê Şehîdanê Xanesorî ra emeye girewtene û ameye berdene keyeyê ci yê dewa Belistênî ya qezaya Dahola. Dima cenaza pê konvoyî ameye berdene Goristanê Şehîd Dilgeş û Şehîd Berxwedanî.

Cenazaya Pîr Çekoyî partîyê sîyasîyî, temsîlkarê rêxistinan, hêzê leşkerî û  îdarkrê dezgehanê sîvîlan zî tede, hetê bi hezaran kesan ra  pê def û zûrna û merasîmê leşkerî ameye definkerdene.

Merasîm de bi nameyê YBŞ û Yewîyanê Cinîyan ê Şingalî (YJŞ) Tîrej Şingalî qisey kerd. Şingalî vat: ''Komelê êzidîyan di fermandarê xo, di rayberê xo vînî kerdî. Fermandar Pîr Çeko mektebêkê xoverdayîşî bi. Şagirtê hemra Zerdeştî bi. Badê fermandî Şingalî ra heta Reqa xeylêk waranê şerî de ca girewt. Semedê qesasê cinîyan ê êzidîyan şer kerd. Rixmo ke bi giranî birîndar bi wezîfe û berpirsîyarîyanê xo ra peyser game nêeşte. Pê tecrube û cesaretî resa mertebeyê fermandarîye. Çirey dişmenî ra nêtersa û  helêke zî nêvindert. Rayrîê Pîr Çekoyî rayîrê serkewtiş û azadîya şarê êzidî yo.

Semedê qesasgirewtişî ganî ma têkoşînê xo xurtêr bikerê. Genî vera xîyanet û îşxalî tewirê ma zelal bo. Ganî mîyanê komelê êzidîyan de ajan û xayînî çînêbî. Ganî dewleta Iraqî vera îşxalê dewleta tirke tewirê xo eşkera ramojno.''

Birayê fermandar Pîr Çekoyî, Ekrem Alî Bedelî zî ard ziwan ke ê do sey keyeyê Pîr Çekoyî heta hela peyêne tim rêçê şehîdan de şirê û vat gonîya şehîdanê ma do erdî de nêmano.

Badê qiseykerdişan û merasîmê leşkerî, Şehîd Pîr Çeko bi tîlîlîyanê dayîkan kişta fermandar û serkêşanê êzidîyan Mervan  Bedel û Saîd Hesenî de ame definkerdene.

Badê merasîmî dewa Belistênî de keyeyê Şehîd Pîr Çekoyî de xeyma tezîye ameye ronayene. Tezîye do hîrê rojî dewam bikero.