Kurdîstan de wextê peyênî de serebûtê kanserî zêdîyayî. Goreyê raporanê Wezîrîya Weşîye ya Tirkîya waqayê merganê bi sebebê kanserî se ra 20.2yî zêdîyayo. Goreyê doneyanê TUÎKî zî2023 de tewr zaf Dêrsim de kanser bîyo sebebê mergan.

Teyna Ame de serrêke de qasê 18 hezar kesan rê teşhîsê kanserî yeno kerdene. Tirkîya û Vakurê Kurdîstanî de qasê 200 tewirê kanserî est ê.

Goreyê doneyanê TUÎKî mîqtarê merganê bi sebebê kanserî wina yê:

"Wan, se ra 18.2

Erzirom, se ra 18.6

Îdir, se ra 18.6

Qers, se ra 18.8

Agirî, se ra 21.8

Şirnex, se ra 11.4

Riha, se ra 10.1

Dîlok, se ra 10

Kilis, se ra 10

Sêrt, se ra 8.5."

Pisporê nêweşîyanê efeksîyonî û Wekîlê DEM Partî yê Agirî Dr. Heval Bozdagî derheqê babete de ANFyî rê qisey kerd.

Dr. Bozdagî pare kerd ke Merkezanê Teşhîskerdişê Lezî yê Kanserî (KETEM) de perwerdeyê Muayeneya Cijêyan a Bixo (KKMM) dîyeno la no perwerde tirkî yo. Bozdagî ard ziwan ke kanser nêweşîyêka winayên a ke verê ci yeno girewtene û vat: ''Çunke merdimî eşkenê sebebanê kanserî werte ra wedarnê yan zî bikêmînê. ''

Bozdagî îfade kerd ke cografyaya Kurdîstanî de ganî xizmetê weşîye bi ziwanê dayîke bêrê kerdene û vat: ''Eke xizmetê weşîye bi ziwanê dayîke bêrê dayene verê nêweşîyanê sey kanserî do bêro girewtene. Heyf ke astengkerdişê xizmetê weşîye yê bi ziwanê dayîke weşîya şarî xeripnaya.''

Bozdagî ard ziwan ke xoza û azadîya merdiman zî seba weşîya komelkîye zaf girîng ê û vat: ''Ganî merdim û xoza azad bibê. Ganî heqê pêro gandaran est bê.''