Hemserekê Komeleya Heqanê Merdiman (ÎHD) Ozturk Turkdoganî derheqê tecrîdkerdişê Rayberê Şarê Kurdî Abdullah Ocalanî de qisey kerd û ard ziwan ke heta ke tecrîd nêro şiknayene û polîtîkayê şerî nêqedîyê qala demokratîkbîyayîşê Tirkîya nêna kerdene.

Turkdoganî îfade kerd ke Abdullah Ocalan 21 serran ra nata Zîndanê Îmraliyî de tepişte yo û Îmrali de qanûnî nênê caardene. Turkdoganî vat: ''Merdimo ke nêeşkeno avûkatanê xo bivîno ci rê qedexeyê pêvînayîşê avûkatan dîyeno. Wa Wezaretê Edaletî na reşwe îzah bikero. Her çi ra verî ganî Zîndanê Îmraliyî qetî bêro qefilnayene. Senî ke zîndananê bînan de keye û avûkatî eşkenê tepişteyan bivînê ganî Zîndanê Îmraliyî de zî rewşe wina biba.''

Turkdoganî bale ante raporê CPTyî ser û pare kerd ke ganî tecrîd bêro şiknayene.Turkdoganî vist vîrî ke peynîya teşrîna peyêne de tepişteyî dest pê grevê vêşanîye kenê û vat no grev netîceyanê girîngan bivisno destî.

Turkdoganî ard ziwan ke grevê vêşanîye yê 2018î de 8 tepişteyî merdî û vat: ''Netîceya ê grevî de îqtîdarî tecrîd wedaritbi. La menga tebaxe de reyna tecrîd vist dewre. Tepişteyan birêka birîske daye. Rîsko tewr pîl zî no yo ke grevê vêşanîye de bedenê xoverdayoxan do qels bibê û nêweş bikewê. Seba ke weşîyê tepişteyan xirab nêbê ganî Wezaretê Edaletî cade tecîd wedaro.''