Hêrişê dewleta tirke yê vera cenazayanê kurdan sey metodêkê şerê taybetî dewam kenê. Tewr peyên cenazaya Hakan Arslan sereyê yew tewreyî de dîyabi babîyê ci Alî Riza Arslanî.

Înîsîyatîfê Hûrmetê Merdeyan û Edaletî ra Adnan Orhanî derheqê hêrişanê dewleta tirke yê vera cenazayan û goran de ANFyî rê qisey kerd.

Orhanî da zanayene ke tim cenazayê kurdan raştê hêrişî ameyêne û vat: ''No feraset qetî nêvurîya. 40 serranê peyênan de zî kerdişê winasênî est bîyî. 90an de dewî ameyêne vêşnayene, merdimî ameyêne kiştene û cenazayê înan ameyêne eştene bîran. Cenazayî peyê panzeran ra ameyêne bestene û erdî ra ameyêne kaşkerdene. Îqtîdarê nikayênî zî no tradîsyonê dewlete teqîb kerd.''

Orhanî dîyar kerd ke wexto ke ey dî ke cenazaya Hakan Arslanî zereyê yew tewreyî de dîyaya babîyê ci ameyo vîrê ey ke serranê 90an de merdimê ci senî ameybî qetilkerdene. Orhanî vat: ''Babîyê mi, apê mi û dezayê mi dewa Bagcilarî ya Pasûrî de ameyî dekerdene yew gorî. Esteyê înan zî zereyê yew tewreyî de dîyabî keyeyê mi. Dima esteyî goristanê bêkesan de ameyî definkerdene. Ez dejo ke Alî Riza Arslan anceno zerrî ra hîs kena. Ferasetê serranê 90an dewam keno. No çi pê exlaq, merdimîye û wijdanî nêno îzahkerdene. No çi netîceya mezgê yewperestî yo.''

Orhanî pare kerd ke her komel û kulturî de merdeyan rê hûrmet est o û vat: ''Bêhûrmetîya vera cenazayan merdiman hêrs kena. Heqê merdiman est o ke goreyê rûmetê merdimîye cenazayanê xo defin bikerê. Ganî nê kerdişê bêperwayî bêrê teşhîrkerdene.''