Gerîlayan bi munasebetê Hewteyê Qehremanîye ANF’yî rê qisey kerd û rodem erjna. Gerîlayan vat:’’Ma bi wesîlaya 28’ê Adare soz danê Rayber Apo û şarê xo. Ma do bi ruhê ewroyî, çar parçeyê Kurdistanî de mucadeleyê xo bikê pêt û serkewtişî esas bigîrê.”

‘Ruhê embaz Egîtî yeno temsîlkerdene’

Kemal Botan: ''Ez sere de şexsê fermandar Mahsum Korkmazî de, pêroyê embazanê şehîdan bi hurmet yad kena. Hewteyê Qehremanîye şarê ma rê pîroz bo. Seba ma Kurdan no hewte wayîrê manaya pîle yo. Bi taybetî heval Egîtî musnayo ma ke ganî vera dişmenî de merdim se vindo û mucadele biko û xora o zî no derheq de sey nimûne yeno musnayene. Se ke yeno zanayene AKP-MHP’yî bi îtîfaqê  faşîstî, vera Kurdan konsepte şerî kerdo dewre û wazeno ke şarê ma qir bikero. Grevê vêşanîye yê ke bi serkêşîya Leyla Guvene û Nasir Yagizî ameyê destpêkerdene her roj hîna benê zêde û êdî her hetê dinyaye de yenê dîyayene. Embazê ke hepisxane de xo ver danê şexsê xo de ruhê embaz Egîdî temsil kenê. Mîrasê xoverdayîşî embaz Egîdî ra mendo û ewro nu ruh vera faşîzmê AKP û MHP’yî de xo ver dano. Nika bi seyan embazê ma, zindanan de bi şîarê “Tecrîdî bişiknê, faşîzmî birijnê” bedene xo vêşanîye rê fîstê ra û bi îradeyê pîlî xo ver danê. Ma roşnîya nê rastîyan de kewtî Hewteyê Qehremanîye. Mucadeleyê ma yew o, yewbînî ra visyaye nîyo. No çarçewa de ganî şarê ma bi cinî û ciwanan, bi ferasetê azadî û demokrasîyî tê bigêro û polîtîkayanê barbarîye pûç bikero. Ma gerîlayî wezîfeyê xo zanê û payan ser ê. Bi destpêkerdişê wisarî, destê ma ra çi bêro ma do bikerê.“

‘Ganî xoverdayîşê grevê vêşanîye bêrê pêtkerdene’

Şevîn Amede: “Ma eşkenê derheqê Hewteyê Qehremanîye de çend çiyan vajê. Sere de fermandarê pîlî Mahsum Kormaz û pêro şehîdanê şorişî bi hurmet yadkerdiş û sozo ke ma dayo înan caardiş, seba ma qaydeyo tewr muhîm o. PKK partîya şehîdan a. Bi şehadete Hakî Karerî Rayberîya ma partiye naye ro. Bi şehadete embaz Egîdî Rayberîya ma leşkerîye nayê ro. Bi şehadete embaza Berîtane bingehê leşkerîya cinîyan ameye eştene. Yanê şehadetan tim rayîrê ma akerdo û bi heyfgirewtişê înan xo newe ra awan kerdo.Her gama ma, her hamleya ma û pêro destkewteyê ma bi gonîya şehîdan ameyê ca. Kulturê xoverdayîşî yê PKK’yî ewro hetê şarî ra ameyo qebulkerdene û şar bin ê kulturî xo ver dano. Seba ke tecrîdê serê Rayber Apoyî bêro wedaritene, Leyla Guvene û bi hezaran embazî grevê vêşanîye de yê. Ganî ma verê nê çalakîyanê bimanayan de vileyê xo bikê çewt û hurmet bimusnê înan. Ganî ma no Hewteyê Qehremanîye de, bi ruhê xoverdayoxanê pîlan tê bigêrê û xoverdayîşî bikê pêt.

'No proses zaf muhîmo û qewimîyayîşê ewroyî do komelî rê bibê mîras'

Berxwedan Mawa: “Ma kewenê hewteyê qehremanîye. Seba ma hewteyêko zaf muhîm o, bi na wesîla ez sere de embaz Egîdî, pêro embazanê şehîdan bi mînet û hurmet yad kena. Tarîxê şar û têgêrayîşê ma de rojanê winasîyan de qehremanê pîlî vejîyayê meydan û xora se ke ewro aseno ê do bivejîye zî. Şaro Kurd seba ke wayîrê anor û azadîya xo û ê şaranê Rojakewtena Mîyanênî bivejîyo, her tim xo ver dayo.  Tarîxê Kurdan de qehremanê zaf pîlî estê û nê qehremanî bîyê sembole xoverdayîşê merdimahî û Rojakewtena Mîyanêne. Prosesê xoverdayîşê PKK’yî yê 40 serreyî de qehremanê sey Egîd û Mehmet Karasungurî vejîyayê.  Reyna xoverdayîşê Sûrî de embaz Çîyager, xoverdayîşê Cizîre de embaz Mehmet Tunç, sey nînan xeylî qehremanî estê tarîxê ma de. Proseso peyên de Leyla Guvene û Nasir Yagizî xoverdayîşanê grevê vêşanîye rê serkêşîye kerde û seba şeref û anorê xo mucadele kenê. Ewro bi hezaran kesî kewtê grevê vêşanîye û tena seba şarê Kurdî nê, seba pêro şaranê bindestan, seba azadîya pêro şaran xo ver danê. Ma ewro hewteyê qehremanîye ra qal kenê la her roja partîya ma roja qehremantîye ya. Ma yew prosesê zaf muhîmî ra derbaz benê. Kerdenê ma do tarîxî rê bibê mal û merdimahîye rê bibê mîras. Ganî ma xo newe ra bîyarê pêser û rastîya xo bivînê, goreyê naye tê bigêrê.  Ma bi wesîlaya 28’ê Adare soz danê Rayber Apo û şarê xo. Ma do bi ruhê ewroyî, çar parçeyê Kurdistanî de mucadeleyê xo bikê pêt û serkewtişî esas bigîrê.”