Gerîlayanê HPGyî bi wesîleya serrgêra 27. ya şehadetê Zeynepe Kinaci (Zîlane) ANFyî rê qisey kerd ke Zîlane 30ê hezîrana 1996î de çalakîya fedayî ya vera artêşa tirke de şehîd bibî.

Firat Gezgor: ''Ma embaze Zîlane, Gulane, Sema û Leyla Sorxwîne bi rêzî yad kenê û sereyê xo verê înan de anê war. Tewr verî embaze Zîlane komployê vera Rayberîye ferq kerd û vera ci têgêraye. Çalakîya ci ya fedayîye ra dima Rayber Apoyî vato 'Zîlane fermandara min a.' Nika bi hezaran embazî bi nameyê Zîlane têkoşîn kenê. Ma deyndarê aye yê. Ma zî sey teqîbkerdoxê ci soz danê ke xeyal û armancanê şehîdan bîyarê ca.'' 

Merwan Botan: ''Embaze Zîlane vera komployê serê Rayberîye, hêrişanê serê Kurdîstanî û qirkerdişê şarê ma çalakîyêka fedayîye kerde. Na çalakîye ma rê zî bîye hêvîyêke ke ma têkoşînê xo geş bikerê û biresnê serkewtişî. Embaze Zîlane bi fikrê hende pîlî resaye bêmergîye.  Çalakîya Zîlane vera polîtîkayanê dewleta tirke ya qirkere bîya cewabêko pîl. Ma do bi ruhê Zîlanan ser bikewê.''