Gerîlayî: Êyê ke vanê 'Ma do biqedînê' bi xo qedîyayê

Gerîlaya YJA-Starî Eyleme Cûdî dîyar kerd ke şar sayê gerîlayan ra est o, gerîlayî zî sayê şarî ra est ê. Gerîlayê HPGyî Husên Azadî zî vat: ''Înanê ke vatêne mîyanê 72 saetan de biqedînê, ê bi xo qedîyayê.''

Gerîlaya YJA-Starî Eyleme Cûdî û Gerîlayê HPGyî Husên Azadî bi wesîleya serrgêra Hemleya 15ê Tebaxe ANFyî rê qala xoverdayîşê vera artêşa tirke ya îşxalkere û asta têkoşînê azadîye kerde. 

Gerîlaya YJA-Starî Eyleme Cûdî ard ziwan ke  bale her kesî gerîlayan ser de ya û vat: ''Seba holîyanê şarî têkoşînêko xurt yeno kerdene. No zî hêvîyanê şarî xurtêr keno.  Bi rastî şar sayê gerîlayan ra, gerîlayî zî sayê şarî ra est ê. Şero ke nika pê perspektîfê Rayber Apoyî yeno kerdene do dewam bikero. Ma armanc kenê ke seba pêro şaran û neteweyan sîstemêkî biafernê. Serra 2024î do biba serrgêra Peymana Lozanî. Sey gerîlayanê neteweya demokratîke ma qerardar ê ke Kurdîstan de bibê yew. Bi azadîya Rayber Apoyî ma do komelî azad bikerê. Ma do nêverdê ke hêvîyanê şarê ma bişikîyê. Serkewtiş qetî do ê ma bibo.''

Gerîlayê HPGyî Husên Azadî vat: ''Ma nika vera teknîk û teknolojîya dişmenî şer kenê. Netîceyê nê şerî eşkera kenê ke ma derbêka senîne danê dişmenî ro. Artêşa tirke cenazayanê xo zî dana bombayan ver, vera ma çekanê kîmyewîyan şuxilnena, kutikan şawena tunelanê ma. Rixmê nê kerdişan zî hema zî a ser nêkewta. Wa her kes hol bizano ke PKKyî ra nêbîyêne şarê ma rewî ra ameyêne îmhakerdene. Dişmen metodê şerê psîkolojîkî ano ca. Înanê ke vatêne mîyanê 72 saetan de biqedînê, ê bi xo qedîyayê. PKK 40 serrî yo xover dano û seba serkewtişî 40 serranê bînan zî do xo ver bido.''