Koyanê Kurdistanî de gerîlatîye bîya parçeyê cuye. 40 serre yo ke hem xo newe ra afernayo û hem zî seba şarê Kurdî bîya hêvî. Tûnika her gerîlayî de yew qelema ke plansazî, çalakî û taktîkî pê yenê nuştene esta. La na qeleme eynî wext de, seba nuştişê şiîran, seba nuştişê rojnuşteyan yena şuxulnayene.

Ferzad Sêdar serra 2013’î de beşdarê gerîlayan bîyo. Ma Roja Cinîyan a Kedkaran ê Dinyaye de rastê heval Ferzad Sêdarî ameyî. Heval Ferzad, seba şahîye karê teknîkî ser xebetîyayêne. Israrê hevalanê xo ser, dest kerd ci yew şiîre wende.

Wendişê şiîre ra dima ma waşt tede sohbet bikê û ey nas bikê. Ferzad Sêdarî waştişê ma qebul kerd û dest kerd ci xo da şinasnayîş: ”Mi heta serra 2010’î şiîrî nênuşnayêne. Mi domantîya xo mabênê şaro ke zêderîye ci Elewî bîyî de derbaz kerde. Qet nuştişê şiîran nêameybî aqilê mi, zîyaderî mi goşdarîya lawikan ra hes kerdêne. Serra 2010’î de, vera hêrişanê faşîstan mi bi çend çekuyan yew şiîre nuşte û reaksîyonê xo wina da teber. Yanê nuştişê şiîre seba mi sey cigêrayîşî dest pêkerd.”

Gerîla Sêdar vano rindekî û kelecanîya koyanê Kurdistanî de bîyayîşî ancax bi şîîre yena tarîfkerdene û wina dewam keno: ”Ez wexto ke kewta mabênê gerîlayan hetê hîsîyatî ra hîna bîya xorîn. Rayber Apo şiîre sey azadîye ra gêrayîşî tarîf keno. Şima ke eslê ci bipersê, qet mi nêzanitê şîîre çi ya û qet mi nêzanayêne ke manaya şîîre azadîye ra gêrayîş a.”

Sêdarî bale ante xoverdayîşê grevanê vêşanîye ser û wina va: ”Çalakîye ya ke Leyla Guvene daya destpêkerdene tena yew çalakîye nîya, yew hemle ya. A yew dayîk a û aye zindan û dej nas kerdo. Bi her hawayî û bi her qeydeyî xo ver dayo û ewro serkêşîya prosesî kena û rayîrê xoverdayîşî tarîf kena.

Gerîla Ferzad Sêdar peyê cû yew şîîra xo ya ke Leyla Guvene û embazanê aye yê xoverdayoxan ser nuşta wende.

Leylaya mi

Leyla! Ti rindekîye bi xo ya

destpêkerdişê zemanî ra

yanê cinîye bi xo.

Nika zî ruhê to kaînatî de bejne pêmeno

Û to homamakîye daya bedenê xo yê helîyayî ra

Çi weş!

Homayê çilekî yew bi yew gonîya ciwanan lênê

Û wazenê ke dem û dewranê xo biçerexnê

To xo rê kerdo heram loqmeyê dewrêşî

Coka şexsê to de xoverdayîş şerm keno

Oy ez bimira.

Welatê to yê di cijikinî de, homamakan wina xo dayêne bi vêşanîye?

Welatê nanî de, bênan mendiş zî Rojî rê bîyêne nesîb!

Biewne Nasir girêdayo zerrîya to ya Evîndare

Zindanî wariştê payan ser û dor bi dore to neqeşnenê

Lawika to dinyaye de sey lawikêka vengnizme

Û qehremanî koyan de govenda to gênê.

Oy ez bimira!

Ma to porê xo de arêdayî

Estareyê şeqetîyayeyî yê welatî

To dej û janê şarê mi kerdê rîyê xo ra û gamzeya xo de dana we

Ti vana qey çimê to bîyê baxçeyê hêvîyanê domanan 

Ti coka wina her tim huyena?

Oy ez bimira!

Ti memire Leylaya mi!