Girê Seyrî yo ke wextêk şarê Wanî tira şaristan û Gola Wanî seyr kerdêne nika pê betonî girewte yo.

Şaredarê Artemêtî yê AKPyî Îsmaîl Sayî Girê Seyrî seba cigêrayîşê înşeatî pêşkêşê terefgîranê xo kerd. Qezaya Artemêtî ya ke pê rindîyanê xo yê xozayîyan namdar a, hedefê qeyûm û terefgîranê AKPyî de ya. 

2016 de îqtîdarê AKP-MHPyî dest na bi Şaredarîya Artemêtî ya HDPyî û ci rê qeyûm tayîn kerdbi. Qeyûm Atif Çîçeklîyî Kelaya Keçê  vurnabi warê rantî û tede bînayî viraştbî. 2019 de weçînayîşan ra dima reyna dest nîya Şaredarîya Artemêtî ya HDPyî ser. Wezîrîya Karanê Zereyî Îsmaîl Sayo ke namzedê AKPyî bi, kerd şaredar. Sayî Artemêt bi temamî pê betonî herimna. 

Aktîvîstê ekolojî Fatîh Şahînî ANFyî rê qisey kerd û vat: ''Girê Seyrî yo ke waranê tewr rindan ê Artemêtî ra yew o, pêşkêşê zengînan ame kerdene. Kanalîzasyonê Artemêtî herikîyeno gola ci. Seba pakîkerdişê gole wesayîtê pakîkerdişî çin o, xoza ame talankerdene. Ma do na şaredarîya qeyûmî vindarnê. Ma venga şarê Wanî danê ke na babete de hişyar bibo.''