Nêzdîyê 5 mengî yo qezayanê Xîzan û Tetwanî de qedexeyê vejîyayîş û dekewtişî est ê, operasyonê sîyasî û leşkerîyî yenê kerdene. Tewr peyên 28ê teşrîna peyêne de domanî zî tede 110 kesî şaristan de ameybî destbendkerdene û nînan ra 50 kesî tepişîyayî. 

Dewanê Hûzeran, Akûnis, Govan, Lanîlan, Xûlepûr, Kekulan, Sûreh, Pertawan, Kuran û Mezra Pisyanî yê Xîzanî de 2yê temmuze de qedexeyê tebervejîyayîşî ame îlankerdene û dima hêrişanê leşkerîyan dest pêkerd. Tetwan de dewa Peyîndasî de 10ê tebaxe de ablûqa ameye îlankerdene, 5 dewijî bi îşkenceyî ameyî destbendkerdene.

Wekîla HEDEPî ya Bedlîsî Semra Çaglar Gokalp derheqê babete de ANFyî rê qisey kerd.

Wekîle Semra bale ante ser ke Tetwan û Xîzan kelayê xoverdayîşî yê coka raştê hêrişanê dewleta tirke yenê. Wekîle Semra vat: ''Tarîxê Komara Tirkîya yê 10 serran mojneno ke meseleya kurdan bi şerî çareser nêbena. Sere de dewanê Gûlpik û Peyîndasî de hamnanî ra nata dewijanê Tetwan û Xîzanî rê zulm yeno kerdene. Merdimî nêeşkenê şorê bax û baxçeyanê xo û heywananê xo weye bikerê. Leşkerî nînan talan kenê, daran birnenê.  Rewşêka winayêne de asayîşê gan û malê merdiman çin o. Cuya ke îqtîdarê AKP-MHPyî kurdan rê rewa vîneno na ya.''

Wekîle Semra dîyar kerd ke seba ke kurdî wareyanê xo biteriknê wina înan rê zulm yeno kerdene û vat: ''Dewan de merdimê 80 serrî yenê destbendkerdene, herêmî yenê qedexekerdene, karê heywankarî û zîretî yenê qedexekerdene û xoza yena çinkerdene. Bi nê hawayî zî merdiman rê koçkerdiş yeno ferzkerdene. Dewlete wazena ke Bedlîs wa bibo herêma leşkerîye. La sey vizêrî ewro zî ma do verê ney bigêrê. Rixmê hende zulm û tedayan zî dewlete do pê kurdan nêeşka.''