Dima ke Tirkîya hêrişê Vakur û Rojhelatê Sûrîye kerd her wextî ra zêdêr yewîya neteweyî kewte rojeva kurdan. Endama Dîwanê Kongreya Komelê Demokratîkî (KCD) Mekîye Guzel derheqê neteweya demokratîke û yewîya neteweyî de ANFyî reyde qisey kerd.

'Yewîya Neteweyî Şert a'

''Yewîya neteweyî ya kurdan şert a. Ma seserra 21. de ciwîyanê na seserre de babeta tewr girînge yewîya neteweyî ya kurdan a. Seba ke erdê kurdan parçekerde yo na babete nêna çarekerdene. Semedê nê perçekerdişî îtîfaqê hêzanê emperyalan o. Ewro firsendêko pîl kewt destê kurdan. Ganî no firsend baş bêro ercnayene û kurdî yewîya xo bîyarê ca.

Çar parçeyanê Kurdîstanî de şar bi yew. Şarê Kurdîstanî seba yewîye amade yo. Eke ma yewîya kurdan awan bikê ma eşkenê vera nê hêrişan vinderê. Dinya ser o 40 mîlyon kurdî estê. Seba ke kurdî nêbi yew Îran, Iraq, Sûrîye kurdî înkar kerdî. 100 serran ra nat nasname û estbîyayîşê kurdan yenê înkarkerdene. Naye ra ewro yewîya neteweyî ya kurdan girîng a.

Kurdî ganî biwazê ke bibê wayîrê statuyî û çarenusê xo tayîn bikê. Kurdan na cuya ke hêzê emperyalîstî seba kurdan çînenê bi têkoşînêkî vurnaye. Rojawanî de vera zulm û zorbazîye têkoşînêko pîl esto. Rojhelatî de kurdî weriştî payan ser û Başûrî de wayîrê îradeyê xo vejenê. Her ca de kurdî seba yewîye qîrenê û wazenê na seserre biba seserra Yewîya Neteweyî ya Kurdan."