Rêxistina HDPyî ya Dêrsimî Meydanê Seyîd Rizayî de vera tepişîyayîşê Semra Guzel bi eşkerayîyêka çapemenîye nêrazîbîyayîşê xo mojna. Temsîlkarê partî û rêxistinan, Wekîlê HDPyî Alîcan Onlu û xeylêk kesî tewrê eşkerayîye bîyî.

Nameyê Rêxistina HDPyî ya Dêrsimî ser o Besîme Gok eşkerayîye wende. Eşkerayîye de pankarta 'Semra Guzel îradeyê ma ya' ameye akerdene.

Goke da zanayene ke îqtîdarê AKP-MHPyî her ke şino hîna bi hawayêkê bêkontrolî hêrişê HDPyî keno û vat: ''Îqtîdarî pê kerdişanê xo yê vera Wekîla ma Semra Guzel reyna mojna ke ê hînî kerdişanê antî-demokratîkan de sînoran nêdanê xo verî. Metodê tepiştişî û pêşkêşkerdişê dîmenanê tepiştişê Semra Guzel qelsîya îqtîdarî eşkera kenê. Bi nê hawayî tepişîyayîşê Guzele vera îradeyê şarî darbe ya. Şexsê Semra Guzel de şarê kurdî û demokrasî yenê hedefkerdene.''