HDPyî verê dewaya Cizîre semedê caardişê edaletî veng da

Hemsereka HDPyî ya Cizîre Gulere Turnça ke verê dewaya qirkerdişê Cizîre eşkerayîye daye waşt ke sûcê ke vera merdimîye ameye kerdene wa bêrê mehkumkerdene.

Dewleta tirke 14ê kanûne ya 2015î de qedexeyê tebervejîyayîşî yê 79 rojan de di borumanê cîyayan de bi desan kesî hewayêkê wehşîyî qetil kerdbî. Rêxistina HDPyî ya Cizîre derheqê dewaya qirkerdişê Cizîre de eşkerayîye daye.

Verê eşkerayîye banê HDPyî bi wesayîtanê zirxinan gerîya binê ablûqa. Rîyê janî ra destûr nêdîya kuçe de eşkerayîye bêro dayene. Nayî ser o eşkerayîye bexçeyê banî de ameye dayene.

Hemsera Qeza Gulere Tunça vist vîrî ke prosesê qedexeyî de nizdê 300 kesan dinyaya xo bedilnaye û xeylêk kesî zî birîndar bîyî û vat: ''Rixmê qeraranê tedbîrî yê  Mehkemeya Heqanê Merdiman ê Ewropa û cehkerdişê rêxistinanê komelê sîvlî nê merdimî ameyî qetilkerdene. Ganî Mehkemeya Qanûnê Bingeyî binê tesîrê AKPyî de memano. AYM wa goreyê qanûnê mîyanneteweyî têbigêro û binpaykerdişê heqanê ke Cizîre de qewimîyayî mehkum bikero.''

Wekîla HDPyî ya Şirnexî Nurane Îmîr zî vist vîrî ke xeylêk keyeyan muracatê AYMyî kerd la zafê înan ameyî redkerdene û vat: ''AYM ewro bi qerarê tarîxî rî bi rî yo. Heta caardişê edaletî ma do teqîpkarê na dewa bê.''