Hemserek Bekîr Gunduzî dîyar kerd ke, seba ke hetkarîya mudaxeleyî yê Semsûrî erey resaye, merdeyî hîna zaf bîyî û vat, seba ney ma bi însîyatîfî wirzîyenê pay û hewl danê ke şarê xo rê bibê hêzê çareserîye.
Hemserekê HDPyî yê Semsûrî Bekîr Gunduzî derheqê erdlerzî de ANFyî rê qisey kerd.
Gunduzî ard ziwan ke, serdestan no erdlerz sey qederî şîrove kerd û berpirsîyarîya xo xo ser ra eşta û vat, ‘‘Nêzdîya 300 hezar însanê ma yê merkezî, nê erdlerzî ra zirarêko gird girewt û se ra 90-95 keyeyan zî xesar girewto. Nê serdê zimistanî de şarê ma teber ra vêşan û bane mendo. Eşkerayîyê ke hetê sazgehanê serdestan ra yenê vilakerdene, şar êdî înan ra bawer nêkeno. Êyê ke dinyaya xo bedilnaya, hûmara fermîye ra hîna zaf ê.’’
Bajaro ke tewr erey dekewt rojeve
Gunduzî da zanayene ke, Semsûr erdlerzî ra 2 rojî dima dekewt rojeve û coka zaf erey mudaxele ameye kerdene û vat, ‘‘Ez sey kesêkê nê bajarî, şahîdê nê çîyî bîya. 2 rojan ra dima hema newe-newe behsê Semsûrî ame kerdene. Înan şarê ma binê xirban de verda.’’
Ma însîyatîf girewt û hewl danê ke bibê hêzê çareserîye
Bekîr Gunduzî dîyar kerd ke seba mudaxeleya ereye, HDP û rêxistinanê sivîlan însîyatîf girewto xo ser û vat, ‘‘Ma rêxistinê sivîlî û partîyê muxalîfî yê Semsûrî vanê ke, no sîstem seba şarê xo çîyêk nêkerdo. Ma însîyatîf girewt û ma hewl danê ke bi paştîyîşanê şarê xo û yê rêxistinanê sivîlan, birînanê şarê xo bipêşê.’’
