AKPyo ke Kurdîstan de hertim weçînayîşan de vera HDPyî bin kewto, herinda ke sindoqan de bibo reqîbê HDPyî, vera HDPyî operasyonanê qirkerdişê sîyasîyî keno.

24ê temmuza 2015î ra nata îqtîdarê AKPyî operasyonanê qirkerdişê sîyasîyî yê vera HDPyî de 15.530 kesî destbend kerdî û 3661 kesî tepiştî. 2016 ra heta nika 10.719 endamê HDPyî ameyî destbendkerdene û 2251 sîyasetmedarê kurdî tepişîyayî. 2015 ra nata 89 hemserekê HDPyî yê şaristanan û 193 hemserekê HDPyî yê qezayan tepişîyayî.

Weçînayîşê 12ê hezîrana 2011î ra verî AKPyî xeylêk operasyonî kerdî û teyna Wan de 47 sîyasetmedarê kurdî tepiştî. 

Weçînayîşanê 24ê hezîrana 2018î ra verî zî operasyonê qirkerdişê sîyasîyî zêdîyayî. Nê operasyonan de 2017 de bi temamî 210 kesî ameyî destbendkerdene. 2018 de zî çarçewa operasyonanê qirkerdişê sîyasîyî de 311 kesî ameyî destbendkerdene.

Weçînayîşanê herêmîyan ê 31ê adare ra verî 2019 de îqtîdarê AKP-MHPyî yê faşîstî 2019 de 59 kesî tepiştî.

Bi nêzdîbîyayîşê weçînayîşanê 14ê gulana 2023yî zî operasyonê qirkerdişê sîyasîyî dîyayî destpêkerdene. Çarçewa nînan de;

-Operasyonanê vera DBP û HDPyî de Hemsereko Pêroyî yê DBPyî Keskîn Bayindir zî tede 15 kesî ameyî destbendkerdene.

-Çarçewa tehqîqatê Serdozgerîya Komare ya Tekîrdagî de sereştişanê vera 10 şaristanan de hemserekê HDPyî zî tede 42 kesî ameyî destbendkerdene.

-Çarçewa tehqîqatê Kobanê de 46 sîyasetmedarê kurdî ameyî destbendkerdene.

-Mersîn de 31 kesî ameyî destbendkerdene.

Bi nê hawayî 2022 de operasyonanê vera HDPyî dde 149 sîyasetmedarê kurdî tepişîyayî.

Weçînayîşanê 14ê gulane ra 20 rojî verî zî Amed de rojnameger, aktîvîst, sîyasetmedar û avûkatî zî tede 126 kesî ameyî destbendkerdene.