Xebatkarê MED-DERî Mehmet Asenayî ard ziwan ke sereştişê vera MED-DERî û Payîz Pirtûkî parçeyêkê polîtîkayanê şerê taybetî yo û îfade kerd ke rixmê teda û destbendkerdişan zî ê do seba ziwanê kurdî bixebitê.
Çarçewa tehqîqatêkê Serdozgerîya Komare ya Amedî de polîsan eşt Komeleya Cigêrayîşê Kultur û Kulturê Mezopotamya (MED-DER), Payîz Pirtûkî ser û Kooperatîfê Ziwan û Hunerî yê Anka ser. Xeylê kesî operasyon de ameyî destbendkerdene.
Xebatkarê MED-DERî Mehmet Asenayî derheqê babete de ANFyî rê qisey kerd.
Asenayî pare kerd ke nê sereştiş û operasyonî vera kurdkî hêrişê topyekûnî yê û vat: ''Na rewşe newe nîya. Hêrişê vera kudkî nê rojan de zêdîyayî. Seba kurdan kurdkî xeta sûr a. Kurdî zî bi hawayêkê topyekûnî vera nê hêrişan xo ver danê. Hetê bînî ra nê hêrişî dewamê polîtîkayanê şerê taybetî yê. Seba ke dezgehê sey MED-DERî bala xo danê kurdkî ser û xebatan kenê raştê nê hêrişan yenê. La ma do verê nê hêrişan de sereyê xo nêarê war.''
Mehmet Asenayî dîyar kerd ke rixmê pêro hêrişan zî ê do têkoşînê xo ra fek vera nêdê û vat: ''Bi hêrişan xîret yeno kerdene ke têkoşînê seba ziwanê kurdkî bêro astengkerdene. La no têkoşîn tim do dewam bikero. Ez tîya ra venga şarê ma dana ke wayîrê ziwanê xo vejîyê. Wa her kes ziwanê xo bimuso, bimusno. No ziwano ke bi hezaran serran o est o, do vinî nêbo. Ganî ma wezîfeyanê xo bîyarê ca û vera nê hêrişan tim bi kurdkî qisey bikerê.''
