Artêşa Iraqî dekewtiş û vejîyayîşê Mexmûrî pê wesayîtanê zirxînan qefilna, nêverda rojnamegerî serebûtî teqîb bikerê. Hemserekê Meclîsê Şarî yê Demokratîkî yê Mexmûrî Yusif Karayî venga her kesî da ke vera ablûqa têbigêro.
Artêşa Iraqî serê sibayî yê 20ê gulane ra nata pê wesayîtanê zirxînan û hêzanê xo kena ke dormeyê Kampa Multecîyan a Şehîd Rûstem Cûdîyî ya Mexmûrî pê têlan bigêra û kuleyan awan bikera. Vera ney xoverdayîşê roniştoxanê Mexmûrî roja hîrêyîne de dewam keno.
Şar xeyman de nobete keno û vano ke heta ke artêşa Iraqî xo apey nêşora xoverdayîşê xo rê dewam bikero.
Ewro roja hîrêyîne de artêşa Iraqî pê wesayîtanê zirxînan qefilna, nêverda rojnamegerî serebûtî teqîb bikerê.
Hemserekê Meclîsê Şarî yê Demokratîkî yê Mexmûrî Yusif Karayî venga pêro merdiman da ke wa verê xîretê ablûqa bigêrê. Karayî pare kerd ke artêşa Iraqî waştişê PDK û Tirkîya ser o dormeyê kampe gêno.
Yusif Karayî vat: ''Tewirê hukmatê Iraqî goreyê qanûnanê Neteweyanê Yewbîyayeyan nîyo. Ma bi zelalî vînenê ke hukmatê Iraqî goreyê fermanê Tirkîya û PDKyî têgêreno. Ma qetî nê nêzdîbîyayîşî qebul nêkenê. Ma zulmî ra remayî ameyî û 30 serrî yo nê erdî ser de yê. Ma venga Neteweyanê Yewbîyayeyan û pêro merdiman danê ke vera na ablûqa vejîyê. Ma reyna hukmatê Iraqî ra wazenê ke goreyê menfaetanê Tirkîya têmegêro, wa hêzanê xo apey bianco. Ma eşkenê bi muzakere û dîyalogan meseleyanê xo çareser bikerê.''
