Merkezê Îrtîbatî û Çapemenîye yê HPGyî bi eşkerayîyêke pare kerd ke 8ê nîsane de herêma Omeryanî ya Mêrdînî de nêzdîyê dewa Cinara de gerîla Xebatkar Bagok û welatperwero ercîyaye Lokman Gorgun şehîd bîyê. Eşkerayîye wina ya:

''Rejîmê AKP-MHPyî yo faşîst rixmê bira çalakînêkerdişê têgêrayîşê ma zî vera hêzanê ma hêrişanê xo rê bêmabên dewam keno. 8ê nîsane de herêma Omeryanî ya Mêrdînî de nêzdîyê dewa Cinara de embazê ma Xebatkar Bagok û welatperwero ercîyaye Lokman Gorgun hêrişê artêşa tirke ya îşxalkere de şehîd bîyî. Artêşa  tirke Gorguno sivîl, bêçek û masûn bêhukmî înfaz kerd û sûcê şerî kerdo. Lokman Gorguno ke perwerê şarê xo û welatê xo bi, şehîdê têkoşînê ma yê azadîye yo. Embaz Xebatkar zî sey hêzanê bînan ê gerîlayan wexto ke pozîsyonê çalakînêkerdişî de bibi şehîd bi. Ma sere de keyeyanê înan ê ercîyayeyan rê, şarê welatperwerî yê Kurdîstanî û Mêrdînî rê serweşîye wazenê. Ma soz danê ke vîrameyîşê şehîdan bidê ciwîyayene û têkoşînê xo biresnê serfîrazîye.

 Nasnameyê embazê ma yê şehîdî Xebatkar Bagokî wina yo:

Nameyê Qodî: Xebatkar Bagok

Name û Peyname: Musa Kahraman

Cayê Bîyayîşî: Mêrdîn

Maye-Pî: Turkane – Ahmet

Tarîx û Cayê Şehadetî: 8ê Nîsana 2023yî /Mêrdîn

Embaz Xebatkar Nisêbînê Mêrdînî de dadîya xo ra beno. O domanîya xo de PKKyî şinasneno û ciwanîya xo de zî tewrê xebatan beno. Embaz Xebatkar 2013 de hetê dişmenî ra tepişîyeno la rixmê îşkenceyan zî tewirê xo ra fek vera nêdano. Embaz Xebatkar 2015 de vera hêrişanê dişmenî verê xo dano koyan, beno gerîla.

Embaz Xebatkar serrêke Mêrdîn de maneno, perwerde gêno. Dima o derbazê Herêmanê Pawitişî yê Medya beno. Embaz Xebatkar vera DAÎŞî Şingal de şer keno û beno wayîrê kedêka pîle. Embaz Xebatkar dima reyna derbazê Mêrdînî beno û tîya de wezîfeyê xo yê serkêşîye ano ca. O Mêrdîn de çalakîyanê serkewteyan de derbanê giranan dano dişmenî ro. Embaz Xebatkar heta şehadetê xo tewirê xo yê Apogîrî ra qetî tawiz nêdano.

Hêrişê îşxalî dewam kenê

Herêma Zapî de 11-12ê nîsane de vera mewzîyan xoverdayîşî yê Sîda hêrişê dişmenî qewimîyayî. Embazanê ma çarçewa xopawitişî de cewab da hêrişan û 4 reyî temasêk qewimîya.

Hêrişê bînî yê îşxalkerî; 11-12ê nîsane de mewzîyê xoverdayîşî yê Çemço û Sîda pê obus, tank û çekanê giranan 37 reyî dîyayî bombayan ver.''