Merkezê Îrtîbatî û Çapemenîye yê HPGyî da zanayene ke Fermandar Rêzan Amed şehîd bîyo û nasnameyê ey eşkera kerd.

Eşkerayîye wina ya:

''Fermandaranê serkêşan ê projeyê newe ra awankerdişê HPGyî ra embaz Rêzan 18ê gulana 2022yî de hêrişê dişmenî yê vera Herêmanê Pawitişî yê Medya de şehîd bi. Embaz Rêzano ke bi fedakarî tewrê Xoverdayîşê Kobanê bibi û rayîr nêdabi cerganê DAÎŞî zerrîya pêro embazanê xo û şarê xo de cayêko gird girewt. Embaz Rêzan pê tempoyê xo yê xebate û fedakarîya xo pêro xebatan de netîceyî girewtî û averşîyayîşê têkoşînê ma rê kedêka pîle daye. Embaz Rêzan bi seyan embazê xo perwerde kerdî û o bi mîmaranê xoverdayîşê Zap, Metîna û Avaşînî ra yew. Sey embazanê ey ma do alaya têkoşînî ya fermandarê ma yê ercîyayeyî Rêzan Amedî dewr bigêrê û bi ferasetê layîqbîyayîşê ey biresnê serfîrazîye.

Nasnameyê embaz Rêzan Amedî wina yo:

Nameyê Qodî: Rêzan Amed Name û Peyname: Umît Tarhan Cayê Bîyayîşî: Amed Maye-Pî: Saadete – Abdullah Tarîx û Cayê Şehadetî: 18ê Gulana 2022yî / Herêmê Pawitişî yê Medya

Embaz Rêzan qezaya Hêni ya Amedî de dadîya xo ra beno. Keyeyê ey seba ke welatperwer bi, maruzê tedayanê dewlete bi la tewirê xo ra fek vera nêda. Embaz Rêzan Amed de beno pîl, ciwanîya xo de şino Ewropa. La o nêeşkeno adapteyê cuya Ewropa bibo û hesreta welatî anceno.

O Tirkîya û Ewropa de 15 serran waneno, zanîngeh de beşê elektrîkî de perwerde vîneno. Komployê vera Rayber Apoyî embaz Rêzanî hêrsî ra keno. O menga komployî sibate de 2007 de tewrê têkoşînê têgêrayîşê ciwanan beno. Embaz Rêzan çend reyî yeno destbendkerdene û Ewropa de zîndan de serrêke yeno esîrkerdene. Embaz Rêzan 2009 de menga ronîyayîşê PKKyî teşrîna peyêne de tewrê gerîlayan beno. O Qendîl de dest pê gerîlatîye keno.

O seba ke bibo layîqê Rayber Apoyî warê leşkerîyî de perwerdeyan gêno. Wexto ke DAÎŞî hêrişê Kobanê kerd embaz Rêzan bi aktîfî mîyanê Xoverdayîşê Kobanê de ca gêno. Rixmo ke o şerê vera DAÎŞî de birîndar beno bi îradeyêkê pîlî têkoşînî rê dewam keno. O Kobanê de çalakîyanê serkewteyan keno û mazharê hûrmetê şar û embazanê xo beno. O dima agêreno koyan û keno ke tecrubeyanê xo embazanê xo de vila bikero. O beno fermandaranê serkêşan ê projeyê newe ra awankerdişê HPGyî ra yew û tim xo rê cuya derwêşan esas gêno.

Embaz Rêzan 18ê gulane de Roja Şehîdan de şehîd beno. Embaz Rêzan kedêka bêhempa daye averşîyayîşê gerîlayan, pê cesaretê xo ters verda zereyê dişmenî, fermandarîya Apogîre şexsê xo de mojnaye. O do tim ma rê bibo mîsal. Nameyê embaz Rêzanî tim bêro yadkerdene, vîrameyîşê ey do biciwîyo û her guleyê vera dişmenî do qesasê ey bigêro.

Ma sere de keyeyê embaz Rêzanî yê ercîyayeyî rê, pêro şarê welatperwerî yê Kurdîstanî rê serweşîye wazenê.'