Merkezê Îrtîbatî û Çapemenîye yê HPGyî bi eşkerayîyêke gerîla Kawa Çekdar yad kerd. Eşkerayîye wina ya:

''Keyeyê embaz Kawa Çekdarî têkoşînêkê pîlî ra dima cenazaya xo girewte û erdê ci de defin kerde. Bi na wesîle ma fermandarê qehremanî Kawa Çekdaro ke gulana 2016î de xoverdayîşê xoîdarekerdişî yê Nisêbînî de şehîd bîyo, bi minet û rêzdarî yad kenê. Ma sere de keyeyê ey ê ercîyayeyî rê pêro şarê Riha û şarê Kurdîstanî rê serweşîye wazenê. 

Nasnameyê embaz Kawa Çekdarî wina yo:

Nameyê Qodî: Kawa Çekdar Name û Peyname: Vakkas Tumen Cayê Bîyayîşî: Riha Maye-Pî: Dursune – Alî Tarîx û Cayê Şehadetî: Gulana 2016î / Mêrdîn

Embaz Kawa qezaya Bêrecûkî ya Riha de dadîya xo ra beno la Ewropa de beno pîl. Embaz Kawa 2008 de Ewropa de tewrê xebatanê ciwanan beno û 2009 de zî verê xo dano koyanê azadan ê Kurdîstanî. Embaz Kawa Qendîl de perwerde vîneno. 2012 de embaz Kawa derbazê Vakurê Kurdîstanî beno û seba şerê şarî yê şorişgêrî dest pê amadekarîyan keno. Embaz Kawa Mêrdîn de beno fermandarêko zixm. 

Embaz Kawa 2015 de xoverdayîşê xoîdarekerdişî yê Nisêbînî de cagêno û serkêşîye keno. Embaz Kawa  Nisêbîn de hetkarîya Fermandar Xebatkar Baranî (Zamanî Çamak) keno, tecrubeyanê xo embazanê xo de pare keno û ciwananê Nisêbînî de mil bi milî têkoşîn keno. Nê prosesî de embaz Kawa beno ewladê şarê Nisêbînî. Embaz Kawa xoverdayîşê xoîdarekerdişî yê Nisêbînî de beno wayîrê kedêka pîle û bi qerardarî têgêreno. 

Embaz Kawa sey fermandarêkê qehremanî nameyê xo tarîxê têkoşînî de nuseno. O tek ewladê keyeyê xo bi û pê şehadetê xo zî keyeyê xo sereberz kerd. Embaz Çekdar pêro ciwanan û embazanê xo rê do bibo mîsal, armancê ey do bêrê caardene û vîrameyîşê ey Kurdîstanê Azadî de do biciwîyo.''