Merkezê Îrtîbatî û Çapemenîye yê HPGyî bi eşkerayîyêke nasnameyê 3 şehîdan eşkera kerdî. Eşkerayîye de wina ame vatene:

''Hêzanê ma 14ê nîsana 2022yî ra nata vera hêrişanê îşxalî bi ruhê fedayî xo ver da, destanê tarîxî afernayî û nê hêrişê îşxalî pûç kerdî. Mewzîyanê tewr girîngan ê nê xoverdayîşî ra yew zî Kelaya Çemçoyî ya Zapî bîye. Artêşa tirke 11 mengan û 20 rojan yanî 353 rojan pê çekanê kîmyewîyan û bombayanê qedexekerdeyan hêrişê na mewzî keerd la reyna zî Kela Çemçoyî de xoverdayîş dewam kerd. Xoverdayoxanê Çemçoyî bi terzê gerîlatîya pispore performansêko pîl mojna û dişmen vist zerarê pîlî mîyanî. Bira Fermandarîya ma ya Îdare û Sewqî ser o xoverdayoxê Kela Çemçoyî 4ê nîsane de tîya ra vejîyayî. La ê 7ê nîsane de Saca de raştê îşxalkeran ameyî. Hêrişê artêşa tirke ser o tîya de pêkewtişî qewimîyayî. Di tenan tîya de ma rê îxanet kerd la embaz Botan Goyî pê şerê fedayîtî şehîd bi. Îxanetê nê wird kesan qetî nêeşkeno xoverdayîşê Kela Çemçoyî biherimno.

Na mewzî de şerî serrêke dewam kerd la ma qetî tede şehîd nêda û zorîye nêdîye. Fermandarîya Îdareyî û Sewqî bira çalakînêkerdişî ser o waşt ke nê embazê ma uca ra vejîyê. 4ê nîsane de embazê ma bi înîsîyatîfê ma mewîya Kela Çemçoyî ra şîyî. Dima wird xayînan rayîrê kela mojna artêşa tirke û artêşa tirke no vurna hîkayeyêka serkewtişî û propaganda. Dima ke ê pê bawer bîyê ke mewzî de çew çin o, di hewteyan ra pey ancax eftayî debikewê kela. Eke înan de rûmetê leşkerîye est bîyêne, zûre nêkerdêne û vatêne 'Ma tunelo ke gerîlayan verdayo, teftîş kerd.'

Nasnameyê embaz Botanî wina yo:

Nameyê Qodî: Botan Goyî Name û Peyname: Bîlal Mihemed Elî Cayê Bîyayîşî: Zaxo Maye-Pî: Gurbete– Mihemed Tarîx û Cayê Şehadetî: 7ê Nîsana 2023yî / Zap

Embaz Botano ke keyeyêkê qilebanijî de şaristanê Zaxoyî yê Başûrî de dadîya xo ra beno û uca de beno pîl. Embaz Botan şehadetê dezayê xo û hêrişanê vera Efrînî ra dima 1ê hezîrana 2008î de tewrê gerîlayan beno. O bi lezî xo gerîlatîye de aver beno û pê kesayetê xo zî beno mazharê hûrmet û heskerdişê embazanê xo. Embaz Botan 2021 de derbazê Zapî beno. O 2021-2022 de bi hawayêkê aktîfî Hemleya Şorişgêre ya Bazanê Zagrosan de cagêno. Embaz Botan 2022 de xoverdayîşê Kela Çemçoyî de cagêno û 353 rojî tîya de derbanê giranan dano artêşa îşxalkere ro. 4ê nîsana 2023yî de embaz Botan mewzî ra vejîya û 7ê nîsane de raştê îşxalkeran ame. Embaz Botan seba ke bi weşî nêkewo destê dişmenî, bi fedayîtî şer kerd û şehîd bi. Ma sere de keyeyê ey ê ercîyayeyî, şarê eşîra Goyî û pêro şarê Kurdîstanî rê serweşîye wazenê.

Tendûrek de 2 gerîlayî şehîd bîyî

Rixmo ke bira têgêrayîşê ma ser o hêzê ma pozîsyonê çalakînêkerdişî de yê, artêşa tirke ya faşîste hêrişanê xo rê dewam kena. 16ê nîsane de, warê Tendurekî yê Serhedî de di embazê ma wexto ke erkê xo ser de bîyê, raştê hêrişê artêşa îşxalkere ameyî. Naye ser o pêkewtiş qewimîya. Netîceya pêkewtişî de fermandara ma ya fedayîye Hêjare û embaz Bager şehîd bîyî.

Nasnameyê embazanê ma yê şehîdan wina yê:

Nameyê Qodî: Hêjare Zozan Name û Peyname: Sevîlaye Akyildirim Cayê Bîyayîşî: Erdexan Maye-Pî: Eflatune – Bîlal Tarîx û Cayê Şehadetî: 16ê Nîsana 2023yî / Serhed

Nameyê Qodî: Bager Baz Name û Peyname: Orhan Kalabalik Cayê Bîyayîşî: Wan Maye-Pî: Zubeyde – Mîhraç Tarîx û Cayê Şehadetî: 16ê Nîsana 2023yî / Serhed

Embaze Hêjare Erdexan de dadîya xo ra bena. Embaze Hêjare domanîya xo de gerîlayan şinasnena. Embaze Hêjare Zanîngehê Gazîyî yê Anqara de fikranê Rayber Apoyî û zulmê vera kurdan zî nêzdî ra şinasnena. A 2002 de çalakîyêke de tepişîyena û 4 mengan zîndan de manena. Embaze Hêjare dima 2005 de tewra gerîlayan bena. Embaze Hêjare bi hawayêkê cidîyî nêzdîyê PKKyî bena û kena ke esasê ci fam bikera. A 2008 de tewra Hêzanê Taybetan bena. A sere de Zap, Avaşîn û Heftanîn de zaf cayan de têkoşin lena. A 2019 de fermandarîya Hemleya Şorişgêre ya Cengê Heftanînî kena. A sey fermandarêka YJA-Starî tim tewr vernî de cagêna. Embaze Hêjare gerîlatîya xo ya 18 serran de têkoşînêko pîl kerd. A tim ala YJA-starî bi layîqî kirişte. Embaze Hêjara ke Fermandara Xeta PKK û PAJKî ya, cuya ci ya fedayîye do ciwanan rê biba esas û mîrasê aye do bi serkewtişî bêra tacîdarkerdene.

Embaz Bager Qelqelî de dadîya xo ra beno. Embaz Bager raştîya dişmenî nêzdî ra şinasneno. O 2019 de şehadetê merdimêkê xo ser o verê xo dano koyanê azadan. O xeylêk cayanê Herêmanê Pawitişî yê Medya de şer keno. Embaz Bager lez adapteyê şerî beno. O tim pêro erk û mesuldarîyanê xo ano ca. Embaz Bager 16ê nîsana 2023yî de warê Tendurekî de pa embaze Hêjare şehîd beno. Ma do xeyalê ey ê azadîye qetî bîyarê ca.''