Merkezê Îrtîbatî û Çapemenîye yê HPGyî bi eşkerayîyêke nasnameyê di şehîdanê Serhedî pare kerdî.

Eşkerayîye wina ya:

''20ê teşrîna verêne ya 2022yî de warê Kirê Halacî yê Gilîdaxî de operasyonê dişmenî de hêzanê ma cewab da hêrişan û mabênê hêzanê ma û îşxalkeran de pêkewtişê giranî qewimîyayî. Netîceya nînan de hêzanê ma çalakîyê bitesîrî kerdî, 4 reyî pê taktîkê sabotajî da dişmenî ro û goreyê tesbîtan tewr tay 4 îşxalkerî ceza kerdî û 1 îşxalker zî bi giranî birîndar kerd. Embazanê ma Canda û Mazlûmî nê çalakîyan de bi cesaretî derbê giranî dayî dişmenî ro û şehîd bîyî. Embazanê ma Canda û Mazlûmî  sey nîşaneyanê îradeyê Apogîrî xoverdayîşî ra apey game nêeşte. Embazê ma Canda û Mazlûm seba xoverdayîşê ma yo ke Vakurê Kurdîstanî de berz beno, bîyî serkêş.

Nê embazanê ma Rojawan û Rojhelatê Kurdîstanî ra verê xo da Vakurê Kurdîstanî û bi armancê azadîye kerd ke bibê milîtanê Apogîrî. Ma sere de keyeyanê înan ê ercîyayeyan rê pêro şarê welatperwerî yê Kurdîstanî rê serweşîye wazenê.

Nasnameyê embazanê ma yê şehîdan wina yê:

Embaze Canda  Tirbêspîyê de dadîya xo ra bena. A hema domanîya xo de têgêrayîşê azadîye şinasnena û ciwanîya xo de pa embaza xo Şehîde Zîlane tewra Şorişê Rojawanî bena. Embaze Canda şerê vera DAÎŞî ra dima bi tesîrê şehadetê embaza xo Zîlane zî verê xo dana koyan û bena gerîla. A Heftanîn de wextêk xebatan kena û dima Qendîl de bena gerîlaya YJA-Starî. embaze Canda 2019 de waştişê xo ser o derbazê Serhedî bena. A Serhed de tewra xeylêk çalakîyanê serkewteyan bena û vera dişmenî têkoşînê xo de qetî tawîz nêdana. Embaze Canda heta nefesê xo yê peyênî xeta şehîdan û Rayber Apoyî de têkoşîn kena û bena şehîd. A do tim bi şehadetê xo serkêşîya ma bikera.

Embaz Mazlûm şaristanê Makuyî yê Rojhelatê Kurdîstanî de dadîya xo ra beno.  Embaz Mazlûmo ke waka ci tewra gerîlayan bîya, netîceya cigêrayîşanê xo de 2015 de Serhed de tewra gerîlayan beno. Embaz Mazlûm perwerdeyanê xurtan ra derbazê Herêmanê Pawitişî yê Medya beno û Zagrosan de dest pê pratîkî keno.Embaz Mazlûm 2019 de reyna derbazê herêma Serhedî beno û tîya de pêro erk û mesuldarîyanê xo bêkêmasî ano ca. Embaz Mazlûm pê têgêrayîşê xo beno layîqê milîtanîya Rayber Apoyî. Embaz Mazlûmî çalakîya xo ya peyêne de derbanê giranan dano dişmenî ro û şehîd beno. Şehadetê ey bawerîya ma ya bi serfîrazîye bihêz kerde.''