Merkezê Îrtîbatî û Çapemenîye yê HPGyî nasnameyê gerîlayanê ke Girê Cehenemî yê Zapî de pê çeka kîmyewîye şehîd bîyê eşkera kerdî. Eşkerayîye wina ya:

''Têgêrayîşê îşxalî yê artêşa tirke ya îşxalkere yê vera Başûrî 14ê nîsane de dîya destpêkerdene la Zap de raştê xoverdayîşê gerîlayan ame û kewt verê binkewtişî. Girê Cehenemî yê Zapî de embazanê ma destpêkê hêrişan ra nara tunelê şerî bi hawayêkê tesîrînî şuxilnauî û pê tîmanê hereketînan pêser derbî dayî dişmenî ro. Embazanê ma vera pêro hêrişanê bi metodanê bêexlaqan ê dişmenî xo ver da û rayîr nêda dişmenî. Embazanê ma di mengan Girê Cehenemî de xoverdayîşêko bêhempa kerd, pêro dinya rê îsbat kerd ke ruho fedayî yê Apogîran qetî çok nêşoro erdî ro. Embazanê ma her nefesê xo de seba azadîya şarê xo gonîya xo rijnaye û îşxalkerî bin kerdî. Artêşa îşxalkere pê xoverdayîşê embazanê ma nêeşkaye û pê çeka kîmyewîye, bombayanê qedexekerdeyan, teyarayanê şerî û helîkopteranê hêrişî warê xoverdayîşî dayî bombayan ver.

Fermandaranê ma yê ercîyayeyan Zinar, Destane, Dîyana, Hebûn û Serdemî vera hêrişanê dişmenî beden û zerrîyê xo kerdî tirs û xoverdayîşêko tarîxî aver berd. Ê netîceya hêrişanê kîmyewîyan ê dişmenî de şehîd bîyî. Înan vera hêrişan xoverdayîşî ra tawîz nêda û bîyî sembolê Hemleya Şorişgêre ya Bazanê Zagrosî. Tecrube û xoverdayîşê înan pêro embazanê înan rê bîyî rêber û seba xoverdayîşê ewroyînî bîyî dîyarker.

Ma sere de keyeyanê înan ê ercîyayeyan rê pêro şarê welatperwerî yê Kurdîstanî rê serweşîye wazenê.

Nasnameyê embazanê ma yê şehîdan wina yê:

Nameyê Qodî: Zinar Gulcan Amanos Name û Peyname: Zinar Xelîl Osman Cayê Bîyayîşî: Derîk Maye-Pî: Refika – Xelîl Tarîx û Cayê Şehadetî: Hezîrana 2022yî /Zap

Nameyê Qodî: Destane Tendurek Name û Peyname: Semra Kalin Cayê Bîyayîşî: Agirî Maye-Pî: Munîre – Galip Tarîx û Cayê Şehadetî: Hezîrana 2022yî /Zap

Nameyê Qodî: Dîyana Norşîn Name û Peyname: Zehra Yeşîltepe Cayê Bîyayîşî: Bedlîs Maye-Pî: Ferzîye – Durmuş Tarîx û Cayê Şehadetî: Hezîrana 2022yî /Zap

Nameyê Qodî: Hebûn Dîrok Name û Peyname: Ahmet Akin Cayê Bîyayîşî: Mêrdîn Maye-Pî: Halîse – Hidir Tarîx û Cayê Şehadetî: Hezîrana 2022yî /Zap

Nameyê Qodî: Serdem Şoreş Name û Peyname: Mehmet Şenol Încî Cayê Bîyayîşî: Amed Maye-Pî: Sureyya – Mehmet Sidik Tarîx û Cayê Şehadetî: Hezîrana 2022yî /Zap

Embaz Zinar şaristanê Girkê Legê yê Rojawanî de dadîya xo ra beno. O verî xebatanê Şorişê Rojawanî de ca gêno û vera cerganê DAÎŞ û El Nûsra şer keno. O 2012 de, 2013 de Serêkanîyê de, 2014 de Şingal de û Cezaa de, 2016 de Hol de birîndar beno la tim agêreno çeka xo. Embaz Zinar dima verê xo dano hesreta xo koyan. O Garê û Zap de gerîlatîye keno. O kedêko pîl dano tunelanê şerî. Perwerdeyê Akademîya Mahsum Korkmazî ra dima o sey fermandarêk agêreno Zapî. Embaz Zinar Girê Cehenemî de serkêşîya embazanê xo keno û qetî rayîr nêdano dişmenî.

Embaze Destane Agirî de dadîya xo ra bena. Embaze Destane 30ê Hezîrana Roja Fedayîtîye de tewra gerîlayan bena. A Serhedî ra derbazê Herêmanê Pawitişî yê Medya bena. A wextê hêrişanê DAÎŞî de vera cergan şer kena û dima reyna agêrena koyanê Zagrosî. Embaze Destane vera hêrişanê serê Herêmanê Pawitişî yê Medya bi xurtî vindena û bi nê hawayî tradîsyonê xoverdayîşê rûmetênî yê PKKyî temsîl kena. Embaze Destane tunelanê şerî yê Girê Cehenemî de şehîd bena. Tewirê aye do tim rayîrî bimojno ma.

Embaze Dîyana Bedlîs de dadîya xo ra bena. Rixmo ke qezayêkî ra yew çimê aye çin bi, a bi qerardarî 2014 de Garzanî ra tewra gerîlayan bena. Embaze Dîyane hîrê serran Zap de, di serran Xakurkê de têkoşîn kena. A dima bena fermandarêka YJA-Starî û tewra perwerdeyan bena. Perwerdeyan ra dima derbazê Zapî bena. Embaze Dîyana Girê Cehenemî de çalakîyanê serkewteyan kena û derbanê giranan dana dişmenî ro. A bi nê hawayî bena sembolêka îradeyê Apogîran û tarîxê têkoşînî de zî sey fermandarêka sembole ca gêna.

Embaz Hebûn Mêrdîn de dadîya xo ra beno. Embaz Hebûn xoverdayîşê xoîdarekerdişî ra dima bi qerardarî 206 de tewre gerîlayan beno. O verî Garê de perwerde gêno û di serran ra dima derbazê Zapî beno. O Zap de bêteredut têkoşîn keno û tim xo rê felsefeya Rayber Apoyî keno esas. Embaz Hebûn dima ke beno fermandar tunelanê şerî yê Girê Cehenemî de rixmê îmkananê kêman zî vera dişmenî xo ver dano û beno fermandaranê serkêşan ê Hemleya Bazanê Zagrosan ra yew. Embaz Hebûn pa çar embazanê xo yê bînan de hêrişê kîmyewî de şehîd beno.

 

Embaz Serdem Amed de dadîya xo ra beno. Embaz Serdem xebatanê xo yê şorişî ra hetê dewleta tirke ra tepişîyeno û panc serran zîndan de maneno. Embaz Serdem dima ke zîndanî ra vejîyeno mîyanê YPSyî de cagêno û 2020 de zî verê xo dano koyan. O perwerde ra dima derbazê Zapî beno. Embaz Serdem Zap de pêro erk û mesuldarîyanê xo ano ca û tim paştî dano embazanê xo. Embaz Serdem Girê Cehenemî de tunelanê şerî de bi fedakarî şer keno û beno şehîd. Rayraşîyayîşê ey ê şorişî do verê ma roşnî bikero û pêro ciwananê Kurdîstanî rê bibo mîsal.''