Merkezê Îrtîbatî û Çapemenîye yê HPGyî nasnameyê hîrê şehîdan eşkera kerdî. Eşkerayîye wina ya:

''Ma eşkerayîya xo ya 17ê hezîrana 2023yî de dabi zanayene ke Girê Şehîd Şahanî yê Xakurkê de komêka îşxalkeran gêrîyaya binê kontrolî, nêzdî ra ameya pirodayene û tîya de 18 îşxalkerî ameyê cezakerdene. Nê pêkewtişan û dima bombardumananê dişmenî de embazê ma Asya (Amara), Azad û Koçer (Seyît) ê ke bîyê serkêşê çalakîye, netîceya şerêkê qehremanî de şehîd bîyî.

Embaze Asyaya ke kênaya Dengizê Reşî ya çêr a, embaz Azado ke ewladê almanan o çêr û sosyalîst o û embaz Koçero ke Rojhelatê Kurdîstanî ra yo bîyî temsîlkarê ruhê PKKyî yê qedîmî. Ruh, hişmendîya neteweya demokratîke û fikrê sosyalîzmî yê ke nê embazanê ma temsîl kerdêne, bi felsefeya Apogîre bîyê bingeyê dewaya ma. Ma do seba ke armancanê nê embazanê xo bîyarê ca bêmabên do têkoşîn bikerê. Nê embazê ma yê şehîdî bi cesaret û fedayîtî şîyî serê dişmenî û înan ancî bi tûjî mojna ke PKK qetî nêno binvistene. 

Sere de keyeyanê înan ê ercîyayeyan rê ma şarê tirk, almanî û şarê kurdî yê welatperwerî rê serweşîye wazenê. 

Nasnameyê embazanê ma yê şehîdan wina yê:

Embaz Asya qezaya Unye ya Orduyî de dadîya xo ra bena. A wexto ke Zanîngehê Samsunî de wendêne xebatanê ciwananê şorişgêran de cagêna û PKKyî û îdeolojîya Apogîre zî şinasnena. 2015 de Pirsûsê Riha de ciwanê şorişgêrî hetê DAÎŞî ra ameybî qetilkerdene. Naye ser o embaze Asya bi hêrs û hîsê qesasî tewra Şorişê Rojawanî bena. Dima a tewra gerîlayan bena û Hêzanê Taybetan de cagêna. Embaze Asya mîyanê gerîlayan de xeta Zîlane de têgêrena. A Xakurkê de tewra xeylêk çalakîyanê serkewteyan bena û cinîya azade kesayetê xo de temsîl kena. Ma do têkoşînê Asyayan heta peynî bîyarê ca û ser bivisnê.

Embaz Azad şaristanê Mainburgî yê Almanya de dadîya xo ra beno. Embaz Azado ke çepgîr bîyo kitabanê Rayber Apoyî waneno û mîyanê xebatanê ciwanan de PKKyî û têkoşînê azadîye yê Apogîrî nêzdî ra şinasneno. Cigêrayîşan ra dima 2016 de tewrê gerîlayan beno.O Qendîl de pratîkê verênî vîneno û dima derbazê warê Xakurkê beno. Embaz Azad Xakurkê de derbanê giranan dano dişmenî ro û têkoşînêkê bitesîrî ano ca. Embaz Azado ke gerîlayêko marîfetîn bîyo 15ê hezîrane de Kolît de bi taktîkanê dewrê neweyî şerê vera dişmenî de tewr peynî de xo ver dano û beno şehîdêko enternasyonel. Mîrasê ey ê têkoşînî do tim vernîya ma roşnî bikero.

Embaz Koçer şaristanê Sine yê Rojhelatê Kurdîstanî de dadîya xo ra beno. Embaz Koçer wextê hêrişanê DAÎŞî de xoverdayîş û têkoşînê gerîlayan nêzdî ra teqîb keno û binê tesîrê fikrê yewîya neteweyî yê PKKyî de maneno. Embaz Koçer naye ser o verê xo dano koyan û beno gerîla. O Qendîl de pratîkê verênî ano ca û xo metodê suîkastî de aver beno. Dima embaz Koçer derbazê Xakurkê beno û bi aktîfî tewrê prosesê şerî beno. O serkêşîya çalakîyan keno, mîyanê şerî de bi mesuldarî têgêreno. Embaz Koçer 15ê hezîrane de hem plankerdiş hem zî caardişê çalakîyan de cagêno û heta nefesê o yê peyênî şer keno. Ma sey embazanê ci soz danê ke xeyalanê ci yê Kurdîstanê Azadî bîyarê ca.