Merkezê Îrtîbatî û Çapemenîye yê HPGyî bi eşkerayîyêke da zanayene ke gerîlayê înan Dîyar Xoşnav Garê de netîceya qezayêkî de şehîd bîyo.

Eşkerayîye wina ya:

''10ê gulana 2023yî de warê Garê de netîceya qezayêkî de embazê ma Dîyar Xoşnav şehîd bîyo. Embaz Dîyar sey ewladêkê Başûrê Kurdîstanî tewrê têkoşînê azadîye bîyo û bi nê hawayî pêro ciwananê Kurdîstanî rê nimûne bîyo. Embaz Dîyarî polîtîkayê multecîbîyayîşî û xeyalê azadîye yê sexteyînî red kerdî û têkoşîn weçîna. Ey pê pratîkê xo û kesayetê xo yê Apogîrî îsbat kerd ke azadîya raştikêne koyanê Kurdîstanî de ya.

Embaz Dîyar vera hêrişanê îşxalî yê dewleta tirke Başûrê Kurdîstanî ra tewrê gerîlayan bi. No tewrbîyayîşê ey sere de keyeyê ey û pêro şarê Başûrî rê sereberzî yo û ganî bêro teqîbkerdene. Ma soz danê ke do tim perwerê vîrameyîşê embaz Dîyarî bibê. Ma sere de keyeyê ey ê ercîyayeyî rê pêro şarê welatperwerî yê Kurdîstanî rê serweşîye wazenê.

Nasnameyê embaz Dîyar Xoşnavî wina yo:

Embaz Dîyar Hewlêr de dadîya xo ra beno. O hêverî tewrê xebatanê Komalanê Ciwanan beno û raştîya PKK û Rayber Apoyî nêzdî ra şinasneno. Embaz Dîyar dima cuyêka rehete red keno û bi qerardarî tewrê gerîlayan beno. Embaz Dîyar tim xo warê îdeolojî û leşkerî de perwerde keno. O waştişê xo ser o 2021 de derbazê herêma Garê ya Herêmanê Pawitişî yê Medya beno. Embaz Dîyar Garê de pêro erkanê xo bêkêmasî ano ca. Embaz Dîyar kedêka pîle dano viraştişê tunelan. O pê kesayetê xo beno mazharê heskerdişê pêro embazanê xo.

Heyf ke embaz Dîyar prosesê amadekarîya şerî de netîceya qezayêkê bêtelîhî de şehîd bîyo. Ma sereberz ê ke heman refan de embaz Dîyarî reyde şer kerd. Ma şexsê embaz Dîyarî de soz danê pêro şehîdanê xo ke seba ke bibê layîqê înan têkoşînî pîl bikerê.''