Endamê Komîteya Rayberdişî ya PKKyî Duran Kalkanî Bernameyê Taybetî yê Medya Haber TVyî rê rojdem ercna.

Qiseykerdişê Kalkanî ra beşêk wina yo:

''Tecrîdê Îmraliyî bi giranî dewam keno. Heta ke no tecrîd nêro wedaritene  Tirkîya de do çîyêk nêro vurnayene. CPTyî êlule de Îmrali zîyaret kerd la derheqê ci de eşkerayîyêke nêdaye. Tewirê CPTyî raşt nîyo. Vergirewtişê îşkenceyî erkê CPTyî yo. CPT bi nê tewirê xo kurdan zî xapîneno. Ganî CPT hetê şarê ma ra her ca de bêro teşhîrkerdene. Wextêkê nêzdî de Hamburg de konferansêk de fikrê Rayber Apoyî ameyî nîqaşkerdene. No zî mojneno ke Rayber Apoyî hetê fikrîyatî ra tecrîd şiknayo. Azadîya Rayber Apoyî do Tirkîya demokrat, Kurdîstanî azad bikera.

Ez embazanê ma yê şehîdan Fazil Botanî û Celal Amedî bi rêzdarî yad kena. Embaz Fazil ewladêkê Botanî yo qehreman bi. O bi taybetî vera tecrîdî tim mîyanê xoverdayîş û têkoşînî de bi. Şerê Zapî yê 2008 de o fermandar bi. Embaz Fazilî o çax serkêşîya şerî kerde. Rayraşîyayîşê ma rayraşîyayîşê azadîye yo. Ganî şarê ma rayîrê şehîdan teqîb bikero û înan hol fam bikero. 

Erdlerzî ra dima ma bire daye ke çalakî nêkerê. Dima ma reyna bire daye ke heta weçînayîşan qet yew çalakîye nêkerê. Ma nika goreyê na bire têgêrenê. La îqtîdarê AKP-MHPyî hêrişanê xo rê dewam keno. AKP-MHPyî tewr peyên hêrişê Şingal, Silêmanî û Rojawanî kerd. Goreyê înan pêro kurdî dişmenê înan ê. Reyna Omeryan de yew gerîlayê ma û yew sivîl hetê dewlete ra ameyî qetilkerdene.  AKP-MHPyî 14ê nîsana 2022yî de bi armancê îşxalî hêrişê Zap, Metîna û Avaşînî kerd. La gerîlayan bi xoverdayîşêkê xurtî cewabê înan da. AKP-MHPyî wina xeyal kerdêne ke vera gerîlayan ser bikewo û bi nê hawayî şoro weçînayîşî. Gerîlayanê ma xeyalê îqtîdarî pûç kerdî. Bira çalakînêkerdişî ya partîya ma ganî hetê her kesî ra hol bêra famkerdene û na çarçewe de ganî her kes mesuldarîya xo bîyaro ca. 

Dewleta tirke pê hêrişê vera Meydanê Teyarayan ê Silêmanî hem YNK, hem Îdareyo Xoser ê Rojawanî hem zî Amerîka tehdît kerdî. Reyna îqtîdarê AKP-MHPyî armanc kerd ke pê nê hêrişan weçînayîşan de ser bikewo. Dewleta tirke bi hawayêkê zelalî lîsteyan virazena, embazanê ma kena nê lîsteyan û vana ke a do nînan bikişa. Dinya ra çewî vengê xo ney rê nêkerd. Na kerdena dewleta tirke bi xo teror a. Dewleta tirke Silêmanî de hêrişê Serfermandarê QSDyî Mazlûm Ebdîyî kerd. Çend reyî vera ey hêrişê winayênî qewimîyabî. Ganî dinya nê kerdişan bivîna. 

Erdlerzê 6ê Sibate qirkerdişêk o ke pê destê AKP-MHPyî ameyo kerdene. Îqtîdarî vera nê erdlerzî qet yew tedbîr nêgirewto. Înan ra çewî îstîfa zî nêkerdo. Nika no îqtîdar şarî ra rayan wazeno. Ganî şar weçînayîşan de hesabê nê kerdişî biperso û îqtîdarî bin bivisno. 

AKP-MHPyî pêro polîtîkayê xo yê weçînayîşî PKKyî ser o kerdê. Ê vera vanê 'Ma vera PKKyî wina kerdo, ê PKKyî de eleqedar ê.' AKP-MHPyî bi xo ma de têkilîye viraştbi. Nika kam ma de têkilîye virazo, AKP-MHP ci rê vano terorîst. La terorîstê raştikênî ê yê. AKP-MHP kurdan qetil keno. Ganî merdimî nê raştîyan bivînê. Xora ma sey PKKyî paştî danê hêzanê demokratan û azadîgîran. Nê rayîrî de ma do AKP-MHPyî birijnê. Ez venga pêro cinî, ciwan, kedkar, bindest û kurdan dana ke wa raya xo bidê namzetanê demokratîkan. Wa rijnayîşê AKP-MHPyî bibo rojdemê her kesî. Tewirê ma wina yo.

Dewleta tirke 1923 de dişmenîya kurdan ser o ronîyabî û hema zî wina ya. A raşte dişmenîye mîrê na dewlete de est a. Verî ganî îqtîdarê AKP-MHP bêro rijnayene. Dima zî ganî na hişmendîya dewlete ganî bêra vurnayene.  Hişmendîya faşîste, kolonyalîste û qirkere ronîyayîşê dewlete ra nata est a. Ganî seserra Tirkîya wina nêba. Ganî na dewlete ra hînî fek vera bêra dayene.

Weçînayîşî parçeyê têkoşînî yê. Nê weçînayîşî ganî prosesê şorişê şaran abikerê. Ganî her kes nê prosesî de vera faşîzmê AKP-MHPyî tewir bigêro. AKP-MHP pêro cepheyanê faşîstan binê sîwana xo de ano yewca. Hêzê demokratîk û azadîgîrî zî binê sîwana Îtîfaqê Kede û Azadîye de ameyî pêser. Ganî bindestî binê Partîya Çep a Keske de bêrê yewca û hêzê xo yew bikerê. Kurdî ganî na seserra komare ya faşîste biqedînê. Ez venga pêro kurdan dana ke dişmenan ra û sîstemê faşîzmî ra nê weçînayîşan de hesab bipersê. Nê weçînayîşan de kurdî do rolêkê pîlî kay bikerê. Coka wa her kes bi hişmendî têbigêro. Hêzê demokrasî û azadîye 14ê gulane do serkewtişêkê pîlî bivisnê destî. Ez her kesî rê serkewtiş wazena.'