Endamê Komîteya Rayberdişî ya PKKyî Duran Kalkanî Medya Haber TV de rojdem ercna.

Qiseykerdişê Kalkanî ra  tayê noqtayê girîngî wina yê:

''Heyetê DEM Partî 28ê kanûne de Rayber Apoyî de pêvînayîşêk kerd. Dima nê heyetî eşkerayîyêke daye û tayê zîyaretî kerdî. Nê heyetî eşkerayîya xo û zîyaretan de vato se ma hendê hayîdarê tedeyîya pêvînayîşî yê. Ma de pêvînayîşêk nêame kerdene û mesajêk nêresa ma. Ma ra çîyêk zî nêame waştene. Xora ma vatibi ke çîyêk bikewo milê ma, ma do bikerê. Seba ma Rayber Apo tim muzakeregîro verên o. Proseso ke hetê Rayber Apoyî ra îdare bibo, ma do tim peyê ci de yê. Rayber Apo çi qerar bigêro ma do bîyarê ca. 

La pratîk û qiseyanê AKPyî de vurîyayîşêk çin o. Tepiştiş, hêriş, tayînê qeyûman dewam kenê. Tecrîd zî dewam keno. Bahçelîyî venga ma û tayê dormeyan kerd la înan bi xo vurîyayîşêk nêkerd. Îqtîdar wazeno ke ê vajê se Rayber Apo wa wina bikero. La çîyo winayên mumkîn nîyo. Xora Rayber Apoyî bi zelalî vat ke eke îmkanî bêrê dayene o do bieşko meseleya kurdan çareser bikero. Ganî şertî bêrê awankerdene ke Rayber Apo sîyaset bikero. Ganî tecrîd biqedo û Rayber Apo azad bibo. Eke îqtîdar çareserîye de samîmî yo ganî hêverî nê çîyan bîyaro ca.

Hetê bînî ra ganî Hemleya Azadîye û têkoşînê seba azadîya Rayber Apoyî dewam bikerê. Ganî têkoşînê ma de qelsîyêke nêba. Xora nê pêvînayîşî ûsn. netîceyê têkoşînê şarê ma de qewimîyayî.

Dewleta tirke bi îdareyê îqtîdarê AKP-MHPyî çend serran ra nata bi xurtî hêrişê gerîlayan, şarê ma, cinîyan û ciwanan kena. Herêmanê Pawitişî yê Medya de gerîlayan vera nê hêrişan xoverdayîşêko destanwarî kerd. Şarê ma Hemleya Azadîye aver berde. Nê şerî zor da dewleta tirke ke Rayber Apoyî de pêvînayîş bikera.

Şerê Gazze, hêrişê Îsraîlî, rijîyayîşê Baasî ûsn. Eke Tirkîya çareserîya meseleya kurdan qebul nêkera a zî do birijîya. Demokrasî seba ameyoxê Tirkîya şert o. Nêbo peynîya Tirkîya zî do sey ê Sûrîye bibo. Ma do biewnê ke îqtîdarê Tirkîya do qiseyanê Rayber Apoyî raşt fam bikero yan ney. 

Heyetê DEM Partî bi cidîyetî partîyan de pêvînayîş kerdî. La AKP cidî nîyo. Tewirê AKPyî tehdîtwarî yo. Rayber Apoyî ancî mojna ke meseleya kilîde ya Tirkîya meseleya kurdan a. Muxatabê çareserîye zî Rayber Apo yo. Nêzdîbîyayîşê AKPyî seke ma vat hema cidî nîyo. Partîyê bînî sey CHPyî bi hawayêkê cidîyî nêzdîyê zîyaretê heyetî bîyî. Ma naye zî vajê ke ganî çew bi hesabanê weçînayîşî nêzdîyê nê qewimîyayîşan nêbo. Hetê bînî ra yew terefo 'rantgîr' est o ke gêreno ke nê prosesî ra çîyêkî bigêro. No teref keno ke pêkewtişan û şerî ra madîyat qezenç bikero.

100 serrî yo dewlete kena ke kurdan çin bikera. La kurdî zî sey verî nîyê. Hem hetê nufusî ra hem zî hetê taybetmendîyan ra kurdî vurîyayî, aver şîyî. Dewlete do nêeşka kurdan bi qirkerdiş, asîmîlasyonî çin bikera. Eke dewleta tirke wazena aver şora ganî meseleya kurdan çareser bikera. Meseleya kurdan zî bi şorişê ferasetî çareser bena. Yanî ganî dewlete ferasetê tekperestî ra fek vera bida.

Rayber Apoyî nê 20-25 serran de ercnayîşê qîmetênî kerdî.Axir înanê ke vatêne qey kurdî do çin bibê verê têgêrayîşê azadîye de çok na erdî ro. Rayber Apoyî ewro zî bi zelalî înîsîyatîf girewt. Rayber Apo wazeno ke şer û pêkewtişan biqedo û zemînêkê huqûqî de meseleya kurdan çareser bikero.

Kamî sîstemê Îmraliyî awan kerdo ganî şertan amade bikero ke Rayber Apo rolê xo yê çareserîye bîyaro ca. Hêverî ganî tecrîd wedarîyo. Feshkerdişê PKKyî çîyêko asan nîyo. Ganî hêverî seba kurdan garantîya cuya demokratîke bêra dayene. Seba nê pêroyînan ganî hêverî Rayber Apo azad bibo. 

Ganî şarê ma û têgêrayîşê ma verê kayan û dek û dolaban de hişyar bibê, tedbîranê xo bigêrê û heta peynî têkoşîn bikerê. Ganî têkoşîn nêvindero. Cinî û ciwanê kurdî ganî serkêşîya nê prosesî bikerê. 

Ganî îqtîdar û dormeyê ci qiseyanê sey 'ma ser kewtî, ma bin vist, şikna' ûsn. ra fek vera bidê. Wa her kes bi uslûbêkê raştî nêzdî bibo. 

Kurdî bêçare û bêalternatîf nîyê. Rayber Apo wazeno ke bingeyê demokratîkbîyayîşê Tirkîya de mesele çareser biba û ma zî paştî danê ney. Ma rixmê hêrişan zî bi cidîyetî nêzdîyê mesele benê. 

Herêmanê Pawitişî yê Medya de şer bi giranî dewam keno. Dewleta  tirke hewayî ra hêrişan kena çunke nêeşkena ke erdî ra hêriş bikera. Gerîlayî zor danê îşxalkeran. Çalakîyê gerîlayan xora rojdem de yê. Yanî aya ke bin kewena dewleta tirke ya, kurdî ney. 

Awbendê Tişrînî de xoverdayîşêko pîl est o. Şerwanê Rojawanî tarîxî nusenê. Ez şehîdanê Tişrînî şexsê Bavê Teyarî de bi rêzî yad kena. Sûrîyeya newîye de ganî modelê Îdareyê Xoserî bêro esaskerdene. Gonîya şarê ma yê Rojawanî bîlasebeb nêrijîyena. Şarê Rojawanî do ser bikewo.

Ez serrgêra 7ine ya îşxalê ci de xoverdayîşê Efrînî zî bi rêzî selam kena. Efrîn de têkoşîn heta azadkerdişî do nêvindero. 

Dewleta tirke ewro erdê Sûrîye de Efrîn, Girê Sipî û Serêkanîyê de  îşxalker a. Ganî vera ney tewir bêro mojnayene. Artêşa Milî ya Sûrîye (SMO) verê xoverdayîşê şerwanan de xo apey antibi. La dewleta tirke cade hewayî ra paştî daye SMOyî. Nika zî yeno vatene ke DAÎŞ xo newe ra gandar keno. No rîyê dewleta tirke ra yo. Tişrîn de dewleta tirke hêrişê sivîlan kena. Nê pêroyî seba ke verê dewleta tirke de bêvengîye est a, yenê kerdene. 

Hêrişê vera Herêmanê Pawitişî yê Medya, hêrişê vera Rojawanî, hêrişê vera şarî, hêrişê qeyûman, tepiştişî dewam kenê. Erdoganî îradeyê şarî çin hesibna. La hetê bînî ra îqtîdar Rayber Apoyî rê teda keno. Vurîyayîş wina nêbeno. Oyo ke demokratîk do nêbo û nêvurîyo do ser nêkewo. Ganî dormeyê demokratîk û sosyalîsî nê hetî ra prosesî rind fam bikerê, bi vurnayîşê xo serkêşîya caardişê demokrasîyî bikerê. Ez her kesî rê serkewtiş wazena.''