Dewa Çîftlîgî û Hunyanî ya qezaya Kanîreşî ya Çewlîgî de ocaxê xiz û kerrayan bi serran o benê sebebê nêrazîbîyayîşê şarî. Rixmê xîretê şarî zî ocaxî nêameyî qefilnayene. Dewijî anê ziwan ke ê tozî ra nêeşkenê panceraya xo abikerê û wexto ke ocax de dînamet teqeno dêsî qelişîyenê ra.

Dewij Engîn Zengînî da zanayene ke goreyê agahîyanê ke Îdareyê Taybetî yê Şaristanî dayê, ocax bi hawayêkê qeçaxî xebitîyeno. Zengînî vat: ''Ocaxî layê ma mehf kerd. Verî la de maseyî est bîyî la nika yew mase zî tede çin o. Ocaxî ra ma tozî ra fatisîyenê. Seba ke ocax goreyê qayîdeyan nêxebitîyeno ma mîyanê tozî de manenê. Ez nêweşê KOAHî ya. Eke ez vejîya teber nêeşkena nefes bigêra, keye de zî ma panecerayanê xo padanê. Wexto ke ocax de dînametî yenê teqnayene seke erd lerzeno dêsan de qelişîyayîşî virazîyenê. Ganî Îdareyo Taybet ê Şaristanî ocaxî ser de cigêrayîşî bikero. La seba ke ocax aîdê birayê Serekê AKPyî yê Kanîreşî yo, çew tira vengê xo nêkeno.''