Dewleta tirke ya îşxalkere 14ê nîsane ra nata pê çek û gazanê kîmyewîyan hêrişê Herêmanê Pawitişî yê Medya kena. Goreyê bîlançoya şerî ya 3 mengan a ke hetê HPG-BÎMî ra ameya eşkerakerdene, dewleta îşxalkere mabênê 14ê nîsane û 14ê temmuze de 1198 reyî pê çeka kîmyewîye, bombayê nuklerî û termobarîkî warê gerîlayan dayê bombayan ver.

Hêrişê kîmyewîyî yê dewleta tirke yê vera Herêmanê Pawitişî yê Medya reyna ameyî belgekerdene. Kapsulo ke madeyanê kîmyewîyan ra yeno pê, hetê gerîlayan ra dîmenê ci ameyî girewtene.

Kapsulo ke vera mewzîyanê şerî yê Girê Şehîd Pîrdoxanî yê Warê Xoverdayîşî yê Girê Amedîyê şuxilîyayo, hetê gerîlayêkî ra bi vateyê 'ewro 11ê temmuza 2022yî yo' yeno qeydkerdene.

Gerîla vano: ''No qafik 10ê temmuze de wexto ke dişmenî waştêne ver bi mewzîyanê Girê Şehîd Pîrdoganî bêro ame teqnayene û kewt zere. Serê ci de rêçêk çin o. Tira roz vejîya.''

Nuşteyê kapsulî şewatî ra vêşayî û gerîla ano ziwan ke madeya zereyê kapsulî dima ke vêşena tira çîyo sey komirî vejîyeno.

Gerîla vano: ''10ê temmuze de saete 05.30 ra heta 07.00 mewzîyê Şehîd Pîrdoganî 3 reyî pê teqaberan, 4 reyî pê kîmyewîyan dîyayî bombaya ver. No zî qafikê madeya kîmyewî yo.

ANFyî 16ê temmuze de derheqê hêrişanê kîmyewîyan ê artêşa îşxalkere de dîmenêk weşanabi. Dîmenan de aseno ke leşkerê îşxalkerî seba ke bi kîmyewîyan hêrişê tunelanê şerî yê Werxelê bikerê amadekarîye kenê.