Endamê Konseya Rayberdişî ya KCKyî Mustafa Karasuyî derheqê rojdemî de ANFyî rê tay ercnayîşî kerdî. 

Mustafa Karasuyî destpêkê qiseykerdişê xo de şexsê Endama Konseya Fermandarîye ya YJA-Starî Gulçîya Gabar û Dilxwaz Gabarî de pêro şehîdî yad kerdî.

Qiseykerdişê Karasuyî ra tay noqtayê girîngî wina yê:

''Rayberê ma 25 serrî yo binê esaretî de yo. 2015 ra nata tecrîdêko giran est o. Heta ke tecrîd wina bêro caardene meseleya kurdan zî do çareser nêba. Dewleta tirke bi tecrîdî qanûnanê xo û qanûnanê mîyanneteweyîyan binpay kena. CPT zî bi hawayêkê keyfî têgêreno û beno hemkarê tecrîdî. CPT bi nê tewirê xo tecrîdî keno meşrû. Dewleta tirke pê tecrîdkerdişê Rayber Apoyî şarê ma û têgêrayîşê ma rê şantaj kena. Wezîrê Edaletî yê Tirkîya vano 'şertê ke destê ma de nîyê înan ra semed Îmrali de pêvînayîş nêbeno.' Na zûr a. Dewleta tirke û îqtîdarê AKP-MHPyî qestî ra tecrîd kenê giranêr.

Ez 1ê Gulane yê her kesî fîraz kena. Ganî 1ê Gulane Roşanê Karkeran û Kedkaran bibo roja têkoşînê vera faşîzmî zî. Ganî hêzê kedkar û demokratîkî yê Kurdîstan û Tirkîya 1ê gulane de yew bibê û vera faşîzmî têkoşînî berzêr bikerê. Emser 1ê Gulane do tesîrê 14ê gulane bikero û bi ruhê 1ê Gulane 14ê gulane de serkewtiş do bêro destvistene.

Erdlerzê 6ê Sibate de bi des hezaran merdiman dinyaya xo bedilnayî û tewr tay 10 şaristanî rijîyayî. Sebebê nê felaketî hukmatê AKP-MHPyî yo. Polîtîkayanê îqtîdarî şar visto nê halî. Erdlerz de ame dîyene ke îqtîdarî şar teyna verdayo. Ganî muxalefetî o çax îqtîdar rezil bikerdêne. Erdogan de qetî şerme çin a. Erdogan teyna armanc keno ke îqtîdarê xo rê dewam bikero. 

Nê weçînayîşî vera sîstemê faşîzmî yenê kerdene. Coka Partîya Çep a Keske ganî vera faşîzmî xo biresnê her kesî. Ganî Partîya Çep a Keske hîna bi çêrî têbigêra. Ganî Partîya Çep a Keske vera sîstemê faşîzmî cepheyê tewr pîlî seba têkoşînî awan bikera. HDP weçînayîşanê 2015î de her cayê Tirkîya de xebitîya û wina bendê weçînayîşî ra derbaz bi. Ganî Îtîfaqê Kede û Azadîye xo biresno pêro beşdanê komelî. Nika erkê ma yo verên rijnayîşê faşîzmî yo. Coka ê kesê ke îtîfaqî teng keno, îtîfaq ganî înan ra xo dûrî bigêro. 

Îqtîdarê AKP-MHPyî seba ke verê binkewtişê xo bigêro hêrişê rojnameger, sîyasetmedar û sivîlan keno. Reyna xeylêk kesî tepişîyayê. 50 serrî yo kurdî bi hawayêkê aktîfî têkoşîn kenê û nê serran de teda û hêrişî pê kurdan nêeşkayî. Nika zî do wina bibo. 

Reyna asayîşê sindoqan zî zaf girîng o. Erdogan nêwazeno ke şoro. Çunke Erdogan dîktator o. Nê prosesê weçînayîşan de beno ke hêriş û provakasyonê îqtîdarî bizêdîyê. Ganî şarê ma vera dek û dolabanê îqtîdarî hayîdar bibo.

Eke ewro Kiliçdaroglu bi rehetî eşkeno vajo ke o elewî yo, no xêrê têkoşînê ma ra yo. PKKyî Kurdîstan û Tirkîya de seba nasnameyê elewîyan têkoşînêko pîl kerd. PKK tim wayîrê elewîyan vejîya. Xêrê têkoşînê PKKyî ra ewro Kurdîstan de mabênê elewîyan, misilmanan û êzidîyan ûsn. de haştîye est a. Rayber Apoyî bi paradîgmaya xo ya neteweya demokratîke rayîrê na haştîya bawerîyan viraşt. 

Heta nika HDPyî zî partîyanê bînan ê kurdan seba elewîyan têkoşînêko pîl kerd û wekîlê elewîyî vetî. Nika Partîya Çep a Keske no mîras dewr girewto. Hişmendîya Partîya Çep a Keske eşkera azadîya bawerîya elewîtîye bîyara ca. Coka ez venga pêro elewîyan dana ke nê weçînayîşan de raya xo bidê Partîya Çep a Keske.''